The Definitive Guide to Living in the Capital , Cairo , Egypt

إيه اللي يحصل لما تجيب نجوم كبار في عالم السينما، وتخليهم يمثلوا قصة تقليدية بإخراج تقليدي بسيناريو تقليدي؟! النتيجة هي فيلم زي "كرم الكينج"!

من إخراج ياسر عبد الباسط بـ نشوف قصة صعود كرم الكينج (محمود عبد المغني)، بمشاهد افتتاحية لـ "الكينج" وهو بـ يذوق المخدرات بلسانه ويشمها، الأمر اللي بـ يخليه يعرف مكوناتها، وإذا كانت أصلية ولا مخلوطة، الأمر اللي بـ يجعل له مكانه وسط عالم المجرمين، وخصوصًا (منذر رياحنة) تاجر المخدرات اللي بـ يتنافس مع الكينج بعد كده على قلب جميلة المنطقة (ريهام حجاج).

مبدئيًا وقبل أي شىء، من الخطأ تمامًا أننا نقدم بطل الفيلم في دور واحد كل مهاراته في الحياة هي قدرته على تمييز الفرق بين أنواع المخدرات، ونظهر كمان مقدار تميزه في المهنة وقدرته على تحصيل مبالغ كبيرة من الفلوس لما يمارس المهنة دي، ثانيًا: غلط أننا نخلي التبرير المنطقي للبطل أنه بـ يشتغل مع تجار المخدرات مش بـ يشتغل تاجر مخدرات! الأمر اللي أثار استنكارنا واستنكار البطلة ريهام حجاج نفسها!

الفيلم بـ يستعرض معركة ممتدة على مدار الأحداث بين الكينج ومنذر رياحنة، اللي أداؤه كان في قمة المبالغة وعدم الإقناع، وتمت المداراة على اللهجة الأردنية من خلال إظهاره بـ يتكلم باللهجة الصعيدية، الصراع بـ يدور بين الرجلين على قلب ريهام حجاج اللى أدائها هي كمان كان ضعيف ومبالغ فيه، ومش عارفين ليه صاحبة واحدة من أفضل وأقوى الأدوار فى مسلسل زي "سجن النسا" وغيرها من الأفلام والمسلسلات، ليه تقبل على نفسها تشارك في فيلم ضعيف بمستوى "كرم الكينج"؟!

الموسيقى التصويرية كانت ضعيفة، وكانت في جزء كبير منها معتمدة على الأغاني الشعبية اللى أصبحت منتشرة فى قنوات الهري الغنائى اللى بـ تقدم النوعية دي من الأغاني على مدار الساعة.

مشاهد الأكشن كلها كانت فى صالح البطل محمود عبد المغني، واللى أداؤه كان بـ يقترب بدرجة كبيرة من أداء محمد رمضان فى سلسلة أفلام "الألماني" وما قبلها وما بعدها، مش عارفين هل عبد المغني بـ يقلد رمضان ولا بـ يحاول يقتسم معاه شريحة المتفرجين المراهقين اللي بـ ينحدروا من مستويات اجتماعية مشابهة لأبطال الأفلام اللي بـ يشاهدوها من خلال أسلوب الملابس أو استعمال الجمل الرنانة أو حتى مشاهد الأكشن المعتمدة في جزء كبير منها على الصراع الجسدي مع بعض والمطاردات بالسيارات.

"كرم الكينج" استمرار لسلسلة من أفلام المغامرات الموجهة بشكل عام للمراهقين، وإن كنا لا ننصح بمشاهدتها للشباب اللي لسه دماغه وتفكيره بـ يتكونوا.