The Definitive Guide to Living in the Capital , Cairo , Egypt

الأمثال بتقول من شابه أباه فما ظلم. والحقيقة إن عادل إمام الفنان الكبير، عمل أكتر من دويتو فني ناجح على مدار تاريخه الفني. يمكن أشهر دويتو له كان مع الفنانة الكبيرة يسرا، واللي قدموا مع بعض مجموعة متواصلة من الأفلام الناجحة واللي شكلت علامات في تاريخهم الفني وفي تاريخ السينما المصرية بشكل عام.

والنهارده بنشوف التعاون الثاني بين محمد عادل إمام وبين ياسمين صبري بعد فيلم جحيم في الهند. والمثير أن التعاون لم يقتصر على أن البطلين يعملوا مع بعض فيلم تاني. لكن المرة دي بنشوف أن فيلم ليلة هنا وسرور نفسه شبه فيلم جحيم في الهند. وبيحاول يقدم خلطة بين الأكشن والكوميديا والدراما في نفس الوقت، علشان يرضي كل الأطراف وخاصة مشاهدين الفيلم في فترة العيد.

ليلة هنا وسرور بيحكي عن سرور النصاب المحترف (محمد إمام) والمنتحل لشخصية رجل أعمال. وفي نفس الوقت بيقع في حب هنا (ياسمين صبري). وبيقدر يوهمها أنه بيشتغل لحساب المخابرات، علشان يبرر لها محاولته سرقة تمثال أثري مهم وغالي.

بنعيب على الأداء التمثيلي لمحمد إمام أنه لسه متأثر بوالده في حاجات كتير. بداية من حركة الجسد وحركة ملامح الوجه واللزمات المعروفة لعادل إمام. أما ياسمين صبري فقدمت أداء جيد ومتناسب مع الدور اللي بتقوم به. وبيشارك ياسمين وإمام في الفيلم: فاروق الفيشاوي، ومحمد ثروت، وبيومي فؤاد، ومحمد عبد الرحمن. من إخراج  حسين المنباوي وتأليف كريم يوسف ومصطفى صقر.

المميز في الفيلم قدرة محمد عادل إمام على تطوير جسمه ولياقته، علشان يأدي مشاهد الحركة الصعبة. كمان سيناريو الفيلم قدم تنويع بين الأكشن والكوميديا والرومانسية. لكن بنعيب على الفيلم إن الكوميديا الموجودة فيه كانت معتمدة على الإيفيهات، أكتر من اعتمادها على المواقف الكوميدية نفسها.

ديكورات الفيلم كانت جيدة وواضح فيها البذخ الإنتاجي. وكمان الموسيقى التصويرية كانت قوية ومعبرة عن التغيرات اللي بتحصل في الأحداث طوال الوقت. وبشكل عام الفيلم يعتبر من الأفلام القوية في فترة العيد.

ليلة هنا وسرور مش أفضل أفلام العيد. لكنه فيلم جيد يستحق المشاهدة والتشجيع.

علشان تبقى عارف:

محمد إمام هو ابن الفنان الشهير عادل إمام ويعتبروا جميعًا مع بعض في فريق فني متكامل بيجمع بين التمثيل والإخراج