The Definitive Guide to Living in the Capital , Cairo , Egypt

ممكن تكون عاوز تقدم فيلم بيقول رسالة مهمة وقوية، لكن مين قال أن الرسالة النبيلة لازم تؤدي في النهاية لعمل قوي؟!

القصة

رشا فريد المنتجة المشهورة، بتجد نفسها في قصة معقدة بتكشف من ضمن تفاصيلها، عالم الإنتاج السينمائي في مصر، والطرق التحايلية اللي ممكن بعض المنتجين يعملوها علشان يحصلوا على تمويل لأفلامهم، وكل ده من خلال جريمة بتحدث في أحد أماكن تصوير أحد الأفلام.

فريق العمل

ليل داخلي من بطولة بشرى وأيمن القيسوني ومحمود حافظ ومنى ممدوح، إخراج الفيلم لحسام الجوهري والتأليف لشريف عبد الهادي.

الأداء التمثيلي

الأداء التمثيلي لكل الأبطال كان من متوسط إلى ضعيف، ومش عارفين ليه بشرى أصبحت بتقدم أدوارها الأخيرة بمزيج من العصبية والتوتر، لكن بعض المشاهد في الفيلم كانت قوية لكن للأسف كانت قليلة وغير مجدية، وبصراحة حسينا بخيبة أمل من الأداء التمثيلي.

السيناريو والحوار والإخراج

على الرغم من أن سيناريو الفيلم كان بيعاني من مشاكل كتير لكنه لم يتسبب لنا في أهم مشكلة بتعملها السيناريوهات وهي الملل. السيناريو كان غير ممل وكان قادر ينوع في تقديمه للأحداث اللي بتحصل على مدار الفيلم علشان يتأكد تمامًا إن المشاهدين مش حاسين بملل، أما الحوار فحسينا في كتير من الأحيان إنه متكلف وإنه كان محتاج يكون أفضل من كده، وبشكل عام إخراج الفيلم كان غير احترافي وكان محتاج يكون أقوى وأفضل.

الديكورات والموسيقى والأزياء

ديكورات الفيلم كانت جيدة، وقدرت تدخلنا في المود العام للأحداث، لكن الموسيقى التصويرية واختيارات الأزياء كانت غير موفقة على الإطلاق، وحسينا إن الموسيقى التصويرية مجرد خلفية للأحداث ولم يكن لها أي مشاركة حقيقية في الفيلم بحيث إنها لم تترك داخلنا أي انطباع يذكر بعد المشاهدة.

الخلاصة

ليل داخلي فيلم بيحمل رسالة مهمة عن الفساد داخل مؤسسات السينما. لكن تنفيذه كان محتاج مزيد من الصبر، وتوفير ميزانية أكبر، ودقة في اختيار النجوم.

علشان تبقى عارف:

الفنانة مني ممدوح اللي شاركت في الفيلم من مواليد 1984 وشاركت قبل كده في كتير من الأعمال زي كفر دلهاب وألف مبروك.