The Definitive Guide to Living in the Capital , Cairo , Egypt

ناس كتير بتستنى الأجازات علشان تسافر وتشوف أماكن جديدة، وفيه برضه ناس بتحب تدخل سينما وتقضي أجازتها بتعمل حاجة جديدة، لكن جزء مش قليل بيفكر عكسهم تمامًا وبيقرر يهرب من الزحمة ويستغل الأجازة دي في الراحة في البيت والهدوء، وممكن فيلم كوميدي يخليه يحس ببهجة وجمال الأجازة، كايرو 360 بترشح لكم 5 أفلام تقدروا كوميدية تتفرجوا عليهم وأنتم مأنتخين لو عاوزين تضحكوا من قلبكم.

غزل البنات

فيلم غزل البنات من أجمل الكلاسيكيات الكوميدية في السينما المصرية، أنتجه أنور وجدي وقام ببطولته عام 1949، رغم أن الفيلم فيه مجموعة كبيرة من الممثلين منهم أنور وجدي وليلى مراد ويوسف وهبي وسليمان نجيب لكن الممثل الكبير نجيب الريحاني قدر من خلال دور  ” أستاذ حمام ” إنه يكون البطل الحقيقي للفيلم من خلال مدرسته الكوميديا الخاصة واللي بيقدم فيها همومه ومشاكله بطريقة مضحكة تخليك متعاطف مع الشخصية اللي بيقدمها.

  الفيلم بيدور حول الأستاذ حمام اللي بيحب تلميذة عنده ” ليلى مراد ” من غير ما يقولها وبيحاول ينقذها من حبيبها النصاب وبيستنجد بشخص تاني “أنور وجدي” وبعدها بتقع التلميذة دي في حبه.

نهاية فيلم غزل البنات اتغيرت عن النهاية اللي كانت مكتوبة وقتها بسبب وفاة نجيب الريحاني قبل انتهاء التصوير بأيام وده أجبر مخرج الفيلم أنور وجدي على تغيير مشهد النهاية اللي كان المفروض يجمع بين ليلى مراد والريحاني والممثل سليمان نجيب، أول عرض للفيلم كان في سينما بشارع عماد الدين أمام قهوة كان دايمًا نجيب الريحاني موجود عليها كنوع من التكريم ليه وحقق الفيلم وقتها إيرادات هائلة.

الناظر صلاح الدين

رغم إن الفنان الراحل علاء ولي الدين معظم أفلامه كانت على مستوى كوميدي مميز جدًا إلا إن فيلم الناظر هو أكتر فيلم حقق إيرادات في تاريخ علاء ولي الدين وأكتر فيلم حقق مشاهدات بعد عرضه على التلفزيون.

بالإضافة إلى إن فيلم الناظر هو من أفضل أفلام السينما الكوميدية إلا أنه كمان قدم للسينما نجمين بقى ليهم أفلام وأعمال كبيرة بعدها هما أحمد حلمي ومحمد سعد اللي كانت بداية شخصية اللمبي اللي اشتهر بيها من فيلم “الناظر”.

الفيلم بتدور قصته حول شاب ورث مدرسة من والده وعائلته وهو غير مؤهل إنه يكون ناظر وبيحاول يعيش بالطريقة اللي شايفها بمساعده صديقه اللمبي، ومن هنا بيتخلق مجموعة من المشاهد والإيفيهات الكوميدية اللي لسة عايشة معانا لحد دلوقتي رغم إن الفيلم اتقدم سنة 2000 ورغم عدد الأفلام الكوميدية اللي اتقدمت من وقتها.

صعيدي في الجامعة الأمريكية

فيلم صعيدي في الجامعة الأمريكية بطولة محمد هنيدي هو صاحب الفضل الأول على معظم نجوم الساحة الفنية الحاليين ومنهم أحمد السقا وطارق لطفي وهاني رمزي ومنى زكي وغادة عادل والمخرج سعيد حامد، وطبعًا كان سبب رئيسي في زيادة أجر وشعبية بطله الأول محمد هنيدي بعد ما قررت شركة العدل جروب سنة 1998 إنها تديله فرصة أول بطولة ليه في السينما بعد أداوره الكوميدية الكتير اللي كانت سبب في نجاح أعمال تانية زي فيلم  “إسماعيلية رايح جاي” ومسرحية “حزمني يا”.

بتدور قصة الفيلم حول شاب من صعيد مصر حصل عل منحة للدراسة في الجامعة الأمريكية ويبدأ في الاختلاط بمجتمع مختلف تمامًا عن مجتمه والمرور بعدد من المواقف الكوميدية.

فيه محاولات حاليًا للحصول على موافقة عدد من نجوم الجزء الأولى لتقديم جزء تاني وده اللي أعلنه هنيدي الفترة اللي فاتت وأكد إن عدد كبير منهم وافق منهم أحمد السقا ومنى زكي.

إسماعيل ياسين في البوليس السري

رغم إن أسماعيل ياسين يعتبر أيقونة الضحك عند المصريين وقدم أكتر من 200 فيلم لكن فيلم إسماعيل ياسين في البوليس السري اللي اتعرض عام 1959 من أكتر الأفلام اللي نجحت وقدرت تعيش لحد دلوقتي خصوصًا مع الدويتو الكوميدي اللي بيقدر يخلقه وجود إسماعيل مع عبد السلام النابلسي في عمل واحد.

الفيلم بتدور قصته حول عسكري بيهرب منه متهم خلال توصيله للسجن وبيحاول بمساعدة أحد الضباط السريين (عبد السلام النابلسي) الوصول للمجرم والعصابة اللي بتساعده من خلال أحداث مليئة بالكوميدية والضحك.

طير أنت

يعتبر أحمد مكي واحد من الناس اللي ساهمت بشكل كبير في تطوير فكرة الاسكتشات الكوميدية والسيت كوم في مصر وده من بداية ظهوره في تامر وشوقية، وصولًا لمحطة نجوميته الحقيقية اللي اكتسبها بعد فيلم  “طير أنت”.

فيلم طير أنت هو تاني بطولة لأحمد مكي بعد “اتش دبور” اللي كان مقتبس من قصة آخر فيلم لعلاء ولي الدين “ابن عز” و اللي ماكملوش علاء بسبب وفاته، طير أنت شهد تطور كوميدي ودرامي كبير وقوي عن إتش دبور بالنسبة لأحمد مكي وكمان كان بداية حقيقية لدنيا سمير غانم اللي الجمهور اكتشف موهبتها الكبيرة في الغناء والتمثيل والاستعراض.

فيلم طير أنت بتدور قصته حول شاب بيحاول يلفت انتباه فتاة فيظهر له عفريت يغير أحداث حياته بشكل كوميدي.