دليلك لاختيار فيلم العيد الأنسب لشخصيتك
أفلام العيد أفلام عيد الفطر 2022 أفلام مصرية سينما 2022 سينمات القاهرة فيلم أشباح أوروبا فيلم العنكبوت فيلم واحد تاني
Cairo 360
موسم عيد الفطر يعتبر واحد من أكتر مواسم الأفلام اللي بيستناها عشاق السينما، علشان يتفرجوا على أفلام تناسب ذوقهم. ولأننا عارفين أن العيدية قليلة – خصوصًا في الزمن الصعب ده- وفي المقابل الأفلام كتير في السينما.. حبينا نعمل لكم دليل يساعدكم في فهم خريطة أفلام موسم عيد الفطر 2022.
لو بتحب مسرح مصر.. شوف (زومبي) بدون تفكير
فريق (مسرح مصر) المسرحي اللي اكتشفه وقدمه الفنان أشرف عبد الباقي، قدر يكون جمهور كبير على مدار السنوات الماضية. بالتالي لو كنت من محبي الكوميديا اللي بيقدمها علي ربيع وحمدي الميرغني وويزو يبقى لازم تشوف (زومبي) اللي بتدور أحداثه عن مطرب شعبي بيمر بمواقف كوميدية نتيجة مطاردة الزومبي لهم.
مش بس جمهور مسرح مصر اللي هيحب (زومبي).. لو بتحبوا أغاني المهرجانات ومقاطع التيك توك الغنائية هتحسوا إن الفيلم يستحق المشاهدة في موسم عيد الفطر 2022.
جمهور (زومبي) هيكون من الأسر اللي شافت عروض مسرح مصر قبل كده، وممكن يعجب الأطفال اللي عاوزه تشوف مشاهد مطاردات كوميدية.
أشباح أوروبا.. مايتفوتش من محبي الأكشن
الشباب اللي سنهم صغير شوية، وعاوزين يتفرجوا على أكشن من اللي مش محتاج تبذل مجهود ذهني كبير علشان تفهم أحداثه. مع جُمل حوارية رنانة من اللي بيستعملوها بعد كده في فيديوهات تيك توك أو حتى في قعدات الصحاب لما بيبقوا عاوزين (يعلوا على بعض).. جُمل زي “أنا الغلطة معايا بموته”… كل ده مع محبين جمال هيفاء وهبي وأروى جودة.. كاريزما عباس أبو الحسن وقفشات أحمد الفيشاوي. كل ده مضروب في الخلاط وهيتم تقديمه في فيلم (أشباح أوروبا).. ماتفوتوش الفيلم ده لو بتحبوا الأجواء دي. لكن لو خروجة السينما للأسرة كلها (أشباح أوروبا) مش هو أفضل اختيار.
العنكبوت.. أكشن لكبار السن!
الجيل الأكبر شويه من الشباب اللي هتحب (أشباح أوروبا).. الجيل اللي اتربى على ثنائيات سينمائية زي أحمد السقا ومنى زكي وحبهم في أفلام زي (تيمور وشفيقة). نتوقع يحب (العنكبوت) اللي بيدور في أجواء أكشن عن تاجر مخدرات بيتعرض لمشاكل كبيرة وبيهرب من مطاردة البوليس.
ماعندناش معلومات كتير مؤكدة عن (العنكبوت)، لكن نتوقع أنه يعجب محبي السقا عمومًا، وهيجذب الجمهور اللي عاوز أكشن (مضمون) وفيه تشغيل دماغ خاصه أن الفيلم من إخراج أحمد نادر جلال اللي قدم لنا مسلسل العائدون ومسلسلات كتير مع الفنان يوسف الشريف زي كفر دلهاب وفيلم بني أدم.
فارس
مافيش معلومات كتير متوافره عن فيلم فارس، لكن من اللي وصل لنا عن الفيلم، من الواضح أن جمهوره هيكون نفس الجمهور اللي بيحب قصص الكفاح والصعود من الصفر، نفس الجمهور اللي بيحب أفلام محمد رمضان أو حماده هلال لما عمل دور ملاكم في (حلم العمر) لكن المره دي هانشوف أحمد زاهر في البطولة. وواضح أنه قرر يجرب حظه في النوعية دي من الأعمال بعد نجاح دوره مع محمد رمضان في مسلسل البرنس.
لو أنت واحد تاني.. شوف “واحد تاني”!
وأخيرًا بقى.. لو شايف إنك شخص تاني غير اللي اتكلمنا عنه في الأفلام اللي فاتت دي كلها، فيلم (واحد تاني) لأحمد حلمي هيكون هو المكان المناسب علشان تقطع تذكرتك وتتفرج على الفيلم.
واحد تاني هيكون مناسب للمشاهدين اللي عاوزين تسلية مضمونة في العيد، من غير تفكير كتير، ومن غير خوف من ألفاظ أو مشاهد مش مناسبة للأسرة كلها. كل ده مع شوية كوميديا كويسة. لكن نتوقع مايكونش فيه مساحة كبيرة للأكشن في الفيلم.
جمهور “واحد تاني” هيكون غالبًا من الأسر اللي عاوزه انبساط مضمون في العيد. أو الـ couples سواء مخطوبين أو متجوزين. ومش هيكون مناسب لشلل الشباب اللي عاوزين أغاني ورقص وأكشن من أول لقطة لأخر لقطة.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
