The Definitive Guide to Living in the Capital , Cairo , Egypt

مين اللي قال أن فيلم قوي معناه فكرة كويسة؟ حتى لو كان عندك فكرة كويسة، لكن ممثلين فاشلين وسيناريو واقع وإخراج ضعيف. هتكون النتيجة في النهاية عمل باهت. لا قادرين نقول عليه سىء جدًا، وعمره ما هيرتقي أنه يكون فيلم ممتاز.

فريق العمل

فيلم يجعلو عامر من بطولة أحمد رزق وبوسي، وبيومي فؤاد وهشام إسماعيل ومحمود الليثي، ومن إخراج شادي علي وتأليف سيد السبكي. وبيشارك في بطولة الفيلم نرمين ماهر والراقصة داليدا أنستازيا، واللي بتقدم رقصة في أحداث الفيلم.

القصة

يجعلو عامر بيحكي عن الشاب (عامر)، شاب بيعيش حياة رتيبة مع زوجته (بوسي). هو محافظ جدًا ومش عاوز يعمل أي نشاط بره البيت، علشان خايف من التفجيرات والعمليات الإرهابية. وهي بتختلف عنه تمامًا في نمط الحياة.

بعد كده بيحصل إنقلاب في حياة عامر، لما بيكتشف إصابته بمرض خطير. وأمامه وقت قليل جدًا علشان يعيش. ساعتها بيبدأ عامر في تغيير نمط حياته بنسبة 100%. ياترى هيعمل إيه؟ وهيكتشف إيه؟ هو ده اللي هنعرفه من خلال أحداث الفيلم.

الإخراج

إخراج الفيلم كان ضعيف جدًا. وتصميم كتير من المشاهد كان لازم يكون أفضل. كمان ترتيب المشاهد وتظبيط الـ(ستوري بورد) الخاصة بالفيلم كان في قمة السوء. والستوري بورد هو تناسق مشاهد الفيلم واستمراريتها على الشاشة، وهى خطوة من الخطوات اللي بتيجي بعد السيناريو، علشان توصل لإخراج جيد للفيلم.

السيناريو والحوار

السيناريو والحوار الخاصين بالفيلم كانوا في أضعف حالاتهم، واعتمدت الكوميديا في الفيلم على كتير من التلميحات والمواقف الجنسية. بل ممكن نقول أن العامل الجنسي كان مقحم بشدة على السيناريو. أما لو هتسألونا عن أكتر شيء مقحم غير الجنس في الفيلم، فكان الرقصات والاستعراضات. واللي تم اقحامها في الفيلم بدون أي مناسبة، لمجرد إن الفيلم فيه نجمة ونجم من النجوم الشعبيين.

الموسيقى والديكور

طبعًا مع فيلم زي يجعله عامر، بيكون من الصعب أننا نتكلم عن الموسيقى والديكور، علشان لم يكن هناك أي اهتمام بهم على الإطلاق للأسف الشديد. لكن الأغاني اللي اتعرضت، من نوعية الأغاني اللي بيتم تقديمها في الأفراح، وجمهور النوعية دي من الأغاني هيعجبهم اللي هيشوفوه في الفيلم.

الخلاصة

يجعلو عامر، فيلم ضعيف على كافة المستويات، لكن كان ممكن يكون أفضل بكتير من اللي شوفناه، لو كان تم استغلال الفكرة اللي فيه بشكل أقوى.

علشان تبقى عارف: الفنان أحمد رزق من الممثلين المصريين المشهورين، وعلى الرغم من أنه بدأ حياته الفنية في التسعينيات، إلا أن الجمهور عرفه من خلال أفلام (علشان ربنا يحبك) و (فيلم ثقافي) واللي تم تصويرهم سنة 2000 أما دوره في فيلم (مافيا) فكان نقطة انطلاق حقيقية له.