The Definitive Guide to Living in the Capital , Cairo , Egypt

المخرجين والكتاب المصريين والعرب، لازم يبدأوا في التفكير في تيمة (المكان)، ومعناها أن مكان ما يتحول من مجرد مكان جغرافي، لمكان بطل للأحداث وصاحب دور فعال فيها.. تقريبًا كل الأفلام اللي تناولت المكان كلاعب رئيسي في الأحداث حققت نجاح كبير.. ولا يمكن نستثني ( يوم للستات) من القاعدة دي.

الفيلم من إخراج كاملة أبو ذكري ومن بطولة إلهام شاهين، نيللي كريم، ناهد السباعي، بالإضافة لمجموعة كبيرة من الفنانين المهمين زي  فاروق الفيشاوي،  محمود حميدة،  هالة صدقي، وغيرهم كتير.

الفيلم بيحكي عن مجموعة من السيدات في منطقة شعبية، بيتم تخصيص يوم خاص لهم في حمام السباحة الموجود في مركز الشباب التابع للمنطقة اللي عايشين فيها، والخبر بيقابله سكان المنطقة بردود أفعل بتختلف ما بين مؤيد ومعارض.

من هنا بيتحول حمام السباحة من مجرد مكان للاعب في الأحداث… حمام السباحة بيغير ويؤثر في شخصية أبطال الفيلم، وبيلعب دور رئيسي في الأحداث لا يقل عن دور باقي أبطال الفيلم!

بالنسبة للأداء التمثيلي نقدر نقول بضمير مرتاح أن الفنانة إلهام شاهين قدمت أفضل أدوارها الفنية في تاريخها الفني كله، وهي بالمناسبة منتجة الفيلم أيضًا… إلهام شاهين قدرت تقدم دور معقد وشخصية امرأة جريئة بتواجه مجتمعها بشجاعة.. ملابسها ومكياجها والحوار المكتوب لها كلها أمور تضافرت علشان تأكد على شخصية الهام العنيدة والجريئة.

نيللي كريم قدمت شخصية سيدة فقدت أسرتها في حادثة العبارة المصرية الشهيرة.. ومن يومها مش قادرة تتجاوز الحزن والإكتئاب اللي بيسيطر على حياتها.. ومن هنا بيتدخل ذهابها لحمام السباحة علشان تبدأ في رحلتها ضد أحزانها وكيفية التصدي لها.

سيناريو الفيلم قدر يفرد مساحة مميزة للشخصيات الرئيسية للفيلم، لكن الحوار في أجزاء كبيرة منه كان مباشر  وحسينا أننا أمام خطبة عصماء بأكثر من مجرد كلام عادي بيخرج من شخصيات عادية بنقابلها في حياتنا اليومية زي ما هو المفروض يخرج من الشخصيات اللي بنشوفها قدامنا.

الديكورات كانت ممتازة واختيار أماكن التصوير كان رائع، وكان من الواضح اهتمام المخرجة كاملة أبو ذكري باختيار أماكن حقيقية وتقديم صورة حية وحقيقية ومليئة بالحركة، وده كان واضح من الكادرات المتميزة اللي قامت المخرجة بتكوينها وساعدت على استمتاعنا بالفيلم.

فيلم يوم للستات تجربة مختلفة، ونقدر نقول عليه بيقدم سينما بجد، ومحاولة جادة على  طريق تقديم سينما مصرية متميزة وبتناقش قضايا مهمة وفلسفية.

علشان تبقى عارف:

الفيلم يعتبر ثاني تعاون سينمائي على التوالي بين إلهام شاهين والمخرجة كاملة أبو ذكري بعد (واحد/صفر).

الفيلم هو أول فيلم سينمائي طويل لكاملة أبو ذكري منذ عام 2009 الذي شهد عرض فيلمها (واحد/صفر).

الفيلم يمثل التعاون الثاني بين إلهام شاهين والكاتبة هناء عطية بعد فيلم (خلطة فوزية).