5 أسباب هيحمسوك لمشاهدة فيلم “تراب الماس” في سينمات القاهرة
آسر ياسين أحمد مراد أفلام عيد الأضحى إياد نصار تراب الماس سينمات القاهرة شيرين رضا مروان حامد منة شلبي
Mohamed Hamdy
كل سنة وانتم طيبين بمناسبة عيد الأضحى المبارك.. وزي كل مواسم الأعياد السينمات بتقدم لنا جرعة تقيلة ومتنوعة من الأفلام. ما بين الكوميديا والأكشن والغموض. لكن فيلم تراب الماس يعتبر واحد من أكتر الأفلام اللي لازم تتفرجوا عليها.. ليه؟ هنقول لكم في السطور الجاية.
1 فريق العمل
مش قصدنا هنا فريق العمل بتاع عمرو دياب! لكننا نقصد فريق عمل الفيلم اللي بيضم اسم مميز زي آسر ياسين. فنان بيختار أدواره السينمائية بعناية وأثبت نفسه بقوة من خلال مجموعة من الأعمال القوية والمميزة زي مسلسل 30 يوم وفيلم فرش وغطا ومن قبلهم دوره الكوميدي في فيلم بيبو وبشير.
وبتشارك آسر في الفيلم الممثلة منة شلبي.. ومنة الصراحة غول تمثيل لا يستهان به. وعلى الرغم من ملامحها الهادية والجميلة لكنها لما بتقف قدام الكاميرا بتتحول لممثلة عملاقة من الطراز الأول. كمان منة عملت ريجيم قاسي مخصوص علشان الفيلم ده.
ماجد الكدواني في دور المقدم وليد سلطان. دور بيجمع بين الشر والذكاء. والكدواني هو أستاذ الأدوار المركبة بدون منازع. شخص قادر على التشكل في أي شخصية يقوم بيها بحيث يقنعنا بكافة تفاصيلها. وهو من أنصار مدرسة الغوص في الشخصية حتى النخاع وتجسيد كل انفعالاتها ومشاعرها حتى بره التصوير. دي مدرسة كان بيتبعها العبقري أحمد زكي الله يرحمه.
حتى الأدوار اللي حجمها أقل شوية بيقوم بيها ممثلين ممتازين زي إياد نصار وشيرين رضا و تارا عماد ومها نصار ومحمد ممدوح. تشكيلة ممتازة من النجوم الشباب اللي كل واحد فيهم محطوط في دوره بالضبط.
2 القصة
القاعدة السينمائية بتقول أن القصة الكويسة بتتحول بسهولة لفيلم كويس جدًا. ومش هنلاقي أحسن من رواية أحمد مراد اللي تربعت على عرش مبيعات الروايات العربية لفترة طويلة، وحققت نجاح جماهيري ونقدي غير عادي. يعني إحنا بنتكلم عن قصة قدرت تكسر الدنيا في وقت قياسي فما بالكم لما تتحول لفيلم. خاصة أن مخرج الفيلم هو مروان حامد زميل أحمد مراد القديم ومخرج باقي أفلامه الأصليين والفيل الأزرق. الفيل الأزرق لما اتعرض سنة 2014 كان الحصول على تذكرة للفيلم أصعب من الحصول على توقيع ليونيل ميسي! وده دليل على نجاح الفيلم. النهارده بنشوف التعاون ده بيتكرر من جديد!
3 آراء الجمهور والنقاد
لحد دلوقت الفيلم بيحقق آراء نقدية وجماهيرية ممتازة. تقدر تتابع المشاركات الكتير على هاشتاج #تراب_الماس على تويتر وفيس بوك علشان تعرف أنه فيلم مميز.. وعلى الرغم من زمن الفيلم الطويل (حوالي 3 ساعات) إلا أن الوقت ده بيمر عليكم بسهولة ومتعة بسبب أحداث الفيلم اللي هتشدك من البداية للنهاية بدون التفكير في الوقت الطويل.
4 الموسيقى التصويرية والديكور
لو كنتم من الناس اللي بيفرق معاها العناصر المساعدة للأفلام زي الموسيقى التصويرية أو الديكورات. الفيلم هيكون فرصة مميزة لسماع أحدث إنتاجات الموسيقار المميز هشام نزيه. واللي مايعرفش هشام نزيه والموسيقى بتاعته ممكن نختصر له الموضوع في أن نزيه هو واحد من أقوى وأهم مؤلفي الموسيقى التصويرية في مصر. ويكفي أننا نستعرض مجموعة من أعماله المميزة اللي صنع لها الموسيقى التصويرية، ليالي أوجيني والكنز و الخلية وأفراح القبة والأصليين وهيبتا وولاد رزق. هو كمان اللي عمل الموسيقى التصويرية لفيلم الفيل الأزرق. يعني له تاريخ مهم من العمل المشترك مع المؤلف أحمد مراد والمخرج مروان حامد.
5 تشجيع السينما المميزة
لو أنت من الجمهور اللي زهق من أفلام العيد التافهة وشركات الإنتاج اللي بتقدم أعمال ضعيفة ومسفة. جه الوقت اللي تعبر من خلال تذكرتك عن رأيك. الإقبال الجماهيري على الأفلام المحترمة والقوية بيسحب السجادة من تحت باقي الأفلام الضعيفة، وبيجبر المنتجين على تقديم أعمال أقوى وأكثر احترامًا لعقلية المشاهد.
والمتابع لإنتاج السينما مؤخرًا هيكتشف إن كتير من شركات الإنتاج بدأت تغير سياستها وتقدم أفلام قوية، بسبب إقبال الجمهور.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
