The Definitive Guide to Living in the Capital , Cairo , Egypt

لما تكون بتعمل إعادة تقديم لفيلم تاني بنفس الإسم، المفروض إنه مايبقاش عندنا مشكلة مع القصة، ويكون التركيز الأساسي على الأداء والتمثيل، لكن صناع After the Wedding عملوا العكس تمامًا! تنفيذ ضعيف للقصة، مع أداء تمثيلي جيد.

فيلم After the Wedding بيحكي عن إيزابيل اللي بتقوم بدورها “ميشيل ويليامز” اللي بتدير ملجأ لليتامى في الهند، لكن الملجأ مش عارف يكمل بسبب نقص التمويل، ومن هنا هتضطر إيزابيل تسافر علشان تاخد تمويل كبير من تيريزا اللي بتقوم بدورها “جوليان مور” لكن الأحداث بتتطور بشكل مختلف عن أي توقعات.

لو كتبنا ملخص للقصة، هنحس إنها قوية ومترابطة، وخامة كويسة يطلع منها سيناريوهات كتير، وتشعبات ممتعة بالنسبة للمشاهد اللي بيحب الأفلام الدرامية، لكن تنفيذ الفيلم نفسه للقصة دي تحديدًا كان ضعيف، وخلق عندنا شعور إننا بنشوف فيلم من الدرجة الثانية، ومن هنا عرفنا إن المشكلة في إخراج “بارت فروندلتش”.

مانقدرش نتجاهل مسؤلية السيناريو اللي كتبه “بارت فروندلتش” كمان، واللي ساهم في إنه  يخلي الشخصيات في الفيلم مش حقيقية، وواضح إنه مش مبذول فيها مجهود، مع إن بشوية مجهود كان ممكن تتقدم شخصيات الفيلم كشخصيات عندها أكتر من دافع، وبيحركها أكتر من هدف، زي الشخصيات اللي بنشوفها في حياتنا العادية، لكن رسم الشخصيات وتقديمها كان ضعيف.

بعد كل ده بنشوف تمثيل قوي من “ميشيل ويليامز” و”جوليان مور” في الأدوار الرئيسية، وباقي الأبطال في باقي الأدوار، لكن الأداء الجيد لوحده عمره ما كان قادر على إنجاح فيلم لوحده، ومن غير تعاون باقي عناصر الفيلم، علشان يقدموا عمل ناجح.