The Definitive Guide to Living in the Capital , Cairo , Egypt

لازم نعترف أننا من محبي الفنان أرنولد شوارزنيجر. وبنعتبر أنه إنسان وفنان متمرد بيحاول يجرب كل شيء في الحياة. بداية من ممارسته للرياضة ثم انتقاله للفن ومن الفن للسياسة ثم من السياسة للفن من جديد. حتى لما كان سياسي وكان تابع للحزب الجمهوري، جرب أكتر من مرة أنه ينتقل من الجمهوريين للديموقراطيين. أرنولد شوارزنيجر من الفنانين اللي بيحبوا يجربوا كل حاجة جديدة. وده ظاهر في فيلمنا اليوم.

فريق العمل

فيلم Aftermath من إخراج إليوت ليستر، ومن تأليف جافير جولون، ومن بطولة أرنولد شوارزنيجر وماجي جراس وسكوت مكنايري وماريانا كالفينو. شوارزنيجر تخصص من زمان في أفلام الأكشن، لكنه مؤخرًا بدأ يقتحم عالم الأفلام الدرامية والإنسانية بقوة، وده ظهر في فيلم Maggie واللي تم إنتاجه في 2015 وبيحكي عن رجل بيحاول يعالج بنته المصابة بفيروس غامض، هيحولها لزومبي.

قصة الفيلم

الفيلم مقتبس عن قصة حقيقية وبيدور حوالين كارثة جوية حصلت منذ فترة، لما تسبب مراقب جوي في اصطدام طائرتين مدنيتين ببعضهم، الأمر اللي نتج عنه كارثة جوية ضخمة. الفيلم بيستعرض ما بعد الكارثة، وإزاي هيقدر أرنولد يكمل حياته بعد خسارته زوجته وبنته الحامل!

السيناريو والإخراج

سيناريو الفيلم كان قوي ومحكم التركيب، واتبع أسلوب مختلف وجميل في حكي القصة، بحيث يتناول الكارثة الجوية من أكتر من منظور، بدون ما يفقد التركيز على عنصر الزمن اللي تم استغلاله أفضل استغلال في سيناريو الفيلم.

الأداء التمثيلي

أرنولد شوارزنيجر لعب دور رائع ومهم جدًا، وقدر يتحكم في ملامحه ومشاعره بدرجة رائعة، ونقدر نقول إن ده أفضل أداء تمثيلي له بعد فيلم Maggie، أما سكوت ماكنيري فقدم أداء تمثيلي متميز، وخاصة في مشهد البكاء أثناء التحقيقات الأولية في الفيلم.

الموسيقى والديكور

الموسيقى التصويرية كانت أكتر من رائعة. موسيقى معموله بحرفية عالية ومتوظفة صح، وبحرفية بنشوف إمتى تكون عالية وصاخبة، وإمتى تكون هادية وحزينة، وأمتى تتوقف تمامًا علشان توصل لنا إحساس الأبطال وقدرتهم التمثيلية العالية.

الخلاصة

فيلم Aftermath فيلم إنساني عظيم. صعب تقدر تتحكم في دموعك وأنت بتشاهده، ونقدر نقول أن أرنولد شوارزنيجر بيعيد اكتشاف نفسه كممثل بعد الفيلم ده.

علشان تبقى عارف: أرنولد شوارزنيجر من مواليد 1947 من أصل نمساوي، وهو في الأساس لاعب كمال أجسام، ثم اتجه لمجال الفن والسياسة، وتولى منصب حاكم كاليفورنيا لفترة.