The Definitive Guide to Living in the Capital , Cairo , Egypt

على الرغم من الفرق الشاسع بين فيلم النهارده اللى بـ ينتمى للأفلام الحوارية الدرامية الهادئة وبين فيلم inglourious basterds العنيف الفانتازى، إلا أننا قررنا نقول لكم أن اللى هـ يعجبه الفيلم الأول هـ يعجبه الفيلم الثانى، ليه؟

لأن المخرج جون ويلز مخرج فيلم النهارده وكوانتن ترانتينو مخرج الفيلم الثانى بـ يشتركوا فى نقطة واحدة: حبهم للحوارات الطويلة والممتدة بين الأبطال، بـ يعتبروا الحوار الوسيلة الأساسية لتوصيل رسالة الفيلم وانفعالات الأبطال على مدي حوالى ساعتين هى عمر الفيلم.

على الرغم من أن الحوار هو البطل الرئيس والمحرك الأساسى للأحداث، إلا أننا ما نقدرش نغفل دور البطلة الأساسية ميرل ستريب فى دور أم عجوز بـ تعانى من مرض السرطان وعلى الرغم من معاناتها من المرض إلا أنها بـ تفرض سيطرتها على جميع الشخصيات من حولها حتى الخادمة الهندية اللى بـ تحل كضيفة على البيت مش بـ تنجو من تهكمها ولسانها الحاد وقدرتها على بسط سيطرتها على أبسط التصرفات فى حياتها وحياة أولادها اللى بـ ييجوا من ولايات أمريكية مختلفة علشان يبحثوا معها ومع الشرطة عن الأب المختفى اللى بـ يتبين أنه انتحر لسبب مجهول.

جوليا روبرتس عملت دور مهم هى كمان كواحدة من بنات ميرل ستريب، واحد من أهم المشاهد اللى قدمتها المشهد اللى بـ تعتدى فيه على والدتها بالضرب للحصول على الأدوية اللى بـ تغيب عقلها وتخلى سلوكها مش مفهوم، حتى أن البوستر الرسمى للفيلم بـ يحمل صورة المشهد الخطير ده، لكن بشكل عام كان عندنا إحساس عام فى كثير من المشاهد بالملل، يمكن بسبب الحوار الممتد على طول خط أحداث الفيلم.

الموسيقى التصويرية ما كانتش بالقوة اللى كنا نتوقعها من فيلم المفروض أنه عالمى، لكن الديكورات كانت بـ تعبر بشكل دافىء وقوى عن رسالة الفيلم، وقدرت تنقل للمشاهدين الجو العام المطلوب منها بأفضل ما يكون.

August: Osage County فيلم ممتاز لو عاوز تتفرج على أداء تمثيلى قوى وأحداث اجتماعية بـ تنمو على نار هادئة، لكن لو كنت من عشاق أفلام السرعة والحركة ننصحك تبعد عن الفيلم ده تمامًا وتستنى فيلم مناسب أكثر.