The Definitive Guide to Living in the Capital , Cairo , Egypt

فترة طويلة مضت علينا بدون ما نتفرج على فيلم مجنون بيخاطب المراهقين مجانين السيارات والأفلام اللي بطولتها بتكون معتمدة طوال الوقت على شخص واحد فقط.. Baby Driver واحد من الأفلام دي.

القصة

الفيلم بيحكي عن سائق مراهق شاب، متخصص في العمل عند العصابات اللي بتسطو على البنوك أو الأماكن اللي بتحتاج هروب سريع بالسيارة، وتخصصه هو الهرب من كافة محاولات القبض عليه. بطلنا ناجح في عمله إلى أقصى حد وبيحقق منه فلوس كويسة، لكن بتحصل له حاجات كتير في حياته بتقلبها رأسًا على عقب وبتخليه يفكر في تغيير مجرى حياته. هل هيقدر ينجح في مسعاه؟ هو ده اللي بنشوفه من خلال أحداث الفيلم.

فريق العمل

الفيلم من بطولة كيفين سبيسي وجون هام وويلبر وفيتزجيرالد وجون بيرنثال ومن إخراج وتأليف إدجار رايت. كيفن سبيسي تعودنا عليه في مسلسل House of cards واللي شوفناها مؤخرًا في موسمها الخامس، لكنه طوال الوقت قادر على تقمص أي شخصيات بيقرر يأديها.

الأداء التمثيلي

زي ما قولنا كيفن سبيسي ممثل قدير بيعرف يكيف نفسه مع أي مسلسل أو فيلم بيقوم بيه، ونقدر نقول أنه زي الماء، بيتشكل بتشكل الفيلم اللي بيقوم ببطولته، كمان باقي الممثلين أداؤهم التمثيلي كان مميز وكل واحد كان قادر يقوم بشخصيته بشكل رائع.

السيناريو والحوار والإخراج

سيناريو الفيلم أبعد ما يكون عن الملل، وقدر يجمع بين الكوميديا والأكشن ومشاهد مطاردة السيارات بشكل متميز ومختلف وكان بقى لنا فترة طويلة ماشوفناهاش، أما الحوار فكان جذاب، وممكن البعض يشوفه معقد شويه لكنه ممتع رغم كل شيء، وطبعًا ده ماكانش هيحصل لولا الإخراج المميز والمختلف.

الديكورات والموسيقى والأزياء

موسيقى الفيلم كانت رائعة وجديدة ومعتمدة على مجموعة رائعة من الأغاني، أما الأزياء والديكورات فعلى الرغم من قوتها ماشوفناش منها أي جديد، ونعتقد أنها كانت محتاجة تكون أفضل من كده.

الخلاصة

فيلم Baby Driver عمل ممتاز للمشاهدين الشباب والمراهقين من محبي مطاردات السيارات الصعبة والخطرة.

علشان تبقى عارف:

إيما ستون كانت مرشحة لبطولة الفيلم لكنها فضلت تقوم ببطولة lala land.