The Definitive Guide to Living in the Capital , Cairo , Egypt

حاجة مميزة جدًا لما نتفرج على فيلم مناسب لظروف الموجة الحارة الضخمة في الصيف الحالي.. الفيلم ده نقدر نعتبره نسمة هوا في عز حر الصيف.

القصة

الفيلم بيدور حول حارس إنقاذ بيقع في صدام ومنافسة مع حارس الإنقاذ الجديد، الأمر اللي بيدفعه لإثبات تفوقه عليه بكل الطرق الممكنة، لكن الأحداث بتضطره للأتحاد معاه للكشف عن جريمة كبيرة بتدور أحداثها في الشاطئ اللي بتحصل عليه المنافسة بين الحارسين.

فريق العمل

فيلم Baywatch من تأليف روبرت بن جارانت وإخراج سيث جوردن، ومن بطولة دواين جونسون وزاك أفرون وألكسندرا داداريو وكيلي روهرباش.

الأداء التمثيلي

عاجبنا قوي ابتعاد دواين جونسون عن أفلام الأكشن، واستغلال قوته في شيء تاني غير تكسير الأشياء والأشخاص! وعلى صعيد آخر اكتشفنا قدراته الكوميدية الرائعة، باقي الممثلين قدموا أداء تمثيلي رائع مليان بالكوميديا الشديدة من أول مشهد لأخر مشهد وخصوصًا زاك أفرون اللي قدر يوقعنا على نفسنا من الضحك في بعض المشاهد!

السيناريو والحوار والإخراج

سيناريو الفيلم معتمد اعتماد كلي على الكوميديا، والكوميديا استمدت جزء كبير منها من الحوار اللي كان مضحك فعلًا، ومن الإخراج اللي نجح يخلي كل مشهد من مشاهد الفيلم قنبلة في الكوميديا، وكل الخلطة دي بيصب نجاحها في النهاية ضمن نجاح الفيلم اللي ما حسيناش بالملل أبدًا وإحنا بنتفرج عليه.

الديكورات والموسيقى والأزياء

ديكورات الفيلم اعتمدت بشكل أساسي على الشاطئ والبحر، وده أكسبها بعد حيوي وجميل، الموسيقى كانت صيفية وحماسية جدًا وده شيء مميز، لكن الأزياء ماشوفناش فيها أي جديد.

الخلاصة

فيلم Baywatch فيلم كوميدي خفيف مناسب للمشاهدة في حر الصيف.

علشان تبقى عارف: الفيلم يعتبر التعاون الثاني بين كل من الممثل (دواين جونسون) والممثلة (ألكسندرا داداريو).