The Definitive Guide to Living in the Capital , Cairo , Egypt

تخيل أنك طفل صغير.. كل حلم جميل بتحلمه بيتحول لحقيقة تسعد كل اللي حواليك.. لو حلمت بفراشات.. أهلك يلاقوا البيت كله فراشات ملونة وجميلة.. ولو حلمت بشخص عزيز عليك هتقابله في الحلم كأنه حقيقة.. لو كان فيلمنا اليوم رومانسي كان ممكن تنتهي قصته عند الجزئية دي.. لكن بما إننا بنتكلم عن فيلم رعب، كان لازم يُطرح السؤال الأهم: لو كانت عندك الموهبة دي لكن بدل ما يجيلك حلم جميل جالك كابوس مرعب… ايه هيكون الوضع ساعتها؟! ده السؤال اللي بيجاوب عليه فيلمنا Before I wake.

الفيلم من تأليف وإخراج مايك فلاناجان، بطولة جاكوب ترمبلي وتوماس جين وكيت بوسورث، بيحكي عن طفل صغير بينتقل لأسرة بتتبناه بعد تعرض إبنهم لحادث غرق في البانيو.. في البداية بتكون الأمور مثالية ورائعة وبتبدأ الأم في الشعور بأن الطفل الجديد بيعوضها عن إبنها اللي مات، لحد ما تكتشف إن الطفل عنده موهبة غريبة، وهى إن كل أحلامه بتتحول لحقيقة، بتشوفها هي وزوجها.

بعد تأكدهم من الموضوع بتبدأ الأم في استغلال الأمر لصالحها.. بتحول الولد لألة عرض أحلام، بعد ما بتخليه يتفرج على صور إبنها الميت.. لكن الأمور بتتعقد والحلم الوردي بيتحول لكابوس، لما بيبدأ الطفل يشوف كوابيس بشعة بتتحول لحقيقة تطارد العائلة المنكوبة.

على الرغم من تصنيف الفيلم كفيلم رعب، إلا إن أحداث الرعب الحقيقية في الفيلم بتبدأ بشكل عملي مع نهاية النصف الأول من الأحداث، وإكتفى صناع الفيلم باعتبار النصف الأول من الفيلم كتمهيد لأحداث الرعب اللي هتحصل بعد كده، وده في رأينا كان تأخير كبير في خط سير الأحداث، لأن كان هناك أكتر من مشهد ممكن يستغلهم المخرج مايك فلاناجان علشان يزود جرعة الرعب، لكنه ما عملش ده.

عالم الرعب الخاص بفلاناجان مش غريب علينا، شوفناه قبل كده فى أفلام زي Hush و Oculusوحاليًا بيستعد لإخراج الجزء الثاني من فيلم Ouija والحقيقة أنه مميز فى استخدام المؤثرات الخاصة وخدع الجرافيك واللي كانت مبهرة في الفيلم. لكن أداء الأبطال اللي بيمثلوا في الفيلم كان عادي وما شوفناش أداء متميز، حتي مع وجود طفل موهوب زي جاكوب ترمبلي اللي هو كمان أداؤه كان متواضع وغير مرعب، وحسينا أن الإهتمام كان أكبر بالمشاهد المعتمدة على المؤثرات الخاصة والخدع الجرافيكية.

Before I wake  فيلم رعب تقليدي معتمد بدرجة كبيرة على المؤثرات الخاصة، لكنه رغم كل شيئ بيقدم حوالي ساعتين من التسلية والرعب اللي بيبحث عنها شريحة كبيرة من رواد السينما خصوصًا الشباب.