The Definitive Guide to Living in the Capital , Cairo , Egypt

لو سألتنا عن الحسنة الوحيدة فى Black Mass أو "القداس الأسود".. لو سألتنا عن سر تميزه عن أي فيلم آخر بـ يناقش قضايا الجريمة المنظمة.. الإجابة فى كل الأحوال هـ تكون واحدة: جوني ديب!

من تأليف وإخراج سكوت كوبر وبطولة جوني ديب وآدم سكوت وكيفين بيكون وبينيديكت كامبرباتش بـ نشوف فيلم مقتبس عن قصة حقيقية عن حياة المجرم وايتي بولجر وقصة تحالفه مع العميل الفيدرالي جون كونيللي والقائمة على مبدأ بيع العصابات الأخرى والوشاية بها مقابل الحماية والتغاضي عن التصرفات الإجرامية له.

الفيلم بـ تدور أحداثه فى فترة السبعينيات، والحقيقة أن الإخراج نجح تمامًا فى صناعة عالم كامل لشكل الولايات المتحدة فى الفترة دي بالتعاون مع الديكور طبعًا والقائمين عليه واللى قدروا يوفروا رؤية بصرية قوية وحقيقية لأمريكا فى السبعينيات وخصوصًا عالم الجريمة المنظمة.

بالنسبة للأداء التمثيلي طبعًا لازم نقول أن جوني ديب "أكل" كل الممثلين الثانيين اللى معاه وتفوق عليهم بسنوات ضوئية، ورجع من جديد للمنطقة اللى بـ يقدر يؤدي فيها بشكل متميز وهي منطقة الشخصيات الغريبة شكلًا وعلى الصعيد النفسي كمان، والحقيقة أن لو كان فيه نقطة قوة أو تميز تحسب للفيلم هـ تكون الاستعانة بجوني ديب فى دور البطولة.. ولو أخرجنا ديب من المعادلة هـ نكون أمام فيلم جريمة آخر كأي فيلم وبدون أي تميز.

على الرغم من المساحات الشاسعة اللى كان ممكن تشتغل فيها الموسيقى التصويرية إلا أنها لم تكن بالتميز أو القوة اللى كنا نتوقعها.. وللأسف لو كان تم الاهتمام بالموسيقى فى الفيلم كان ممكن نوصل لنتائج أفضل من اللى وصلنا لها فى الفيلم، إحقاقًا للحق لازم نعترف أن الموسيقى التصويرية كانت قوية ومؤثرة.. لكن بالنسبة لفيلم بـ يتكلم عن الجريمة ومقتبس عن قصة حقيقية كان ممكن تكون الموسيقى أفضل.. أو على الأقل بنفس قوة الديكور والاهتمام به.

قبل موسم الأوسكار من كل عام واللى بـ يتم الاحتفال به فى شهر فبراير، بـ يتم تقديم أفلام كثير مقتبسة عن قصص حقيقية ولنجوم كبار كمحاولة لمغازلة لجنة التحكيم ومحاولة الفوز بجائزة أو على الأقل ترشيح.. لكن مع عدم اهتمام صناع Black Mass بأي تفصيلة فى الفيلم أكثر من الاهتمام بجوني ديب كبطل متميز.. للأسف الفيلم مش هـ يحصل على أي جوائز من وجهة نظرنا.