The Definitive Guide to Living in the Capital , Cairo , Egypt

مين قال أن الأفلام منخفضة الميزانية لازم تكون منخفضة الجودة كمان؟ الحقيقة أن هوليوود بـ تشهد عدد كبير من الأفلام منخفضة التكلفة وفي نفس الوقت بـ تقدم حالة سينمائية خاصة ومجنونة، وقدرة عالية على استغلال السيناريو لتحقيق أعلى قدر ممكن من النجاح… ده بـ يحصل مع أفلام زي Everly او Desperado قديمًا.. ونفس الكلام بـ يتكرر مع Cop Car.

من إخراج جون واتس وبطولة كامرين مانهايم وكيفين بيكون وشيا ونجهام وجيمس فريدسون بـ نشوف قصة طفلين في نهاية الطفولة وبداية المراهقة، بـ يحاولوا يستكشفوا الدنيا حولهم، وبـ يعثروا بالصدفة على سيارة شرطة خاصة برجل شرطة فاسد.

على الرغم من بساطة الموقف في الظاهر، إلا أن الأحداث اللى بـ تترتب على اختفاء السيارة وقيام الولدين هاريسون وترافيس (جيمس فريدسون جاكسون) و(هيس ويلفورد) بسرقة السيارة… بـ تاخد الفيلم لمنحنى طويل من الغموض والإثارة.

الأداء التمثيلي للبطل البالغ الوحيد في الفيلم تقريبًا ألا وهو كيفن باكون، كان متميز وقوي جدًا، مع تعبيرات وجهه المرعبة وقدرته على تغيير شكله وأداؤه التمثيلي بشكل قوي ومتميز.

على الرغم من الملل اللى ممكن يتسرب للنفس في منتصف أحداث الفيلم، إلا أن كل مرة كنا نحس ببعض الملل المخرج جون واتس كان بـ يعطينا مشهد يجعلنا نقفز ثاني لمنتهى التحفز، زي المشهد الصامت اللى بـ يظهر فيه الأطفال بـ يلعبوا بالأسلحة النارية.. وهو المشهد اللى خلانا نشعر بالهلع لمدة ثواني معدودة هي عمر المشهد.

الفيلم بـ يلقى ظلال بالغة القتامة على العلاقات الأسرية، وضرورة متابعة الأهل لأطفالهم، وحالة التفكك الأسري اللى بـ تعاني منها الولايات المتحدة ونشأة جيل كامل من الأطفال دون رقيب أو حسيب، كمان الفيلم بـ يتكلم بشكل مستتر عن أزمة بيع السلاح للأطفال والمراهقين، والحوادث اللى حصلت مؤخرًا كانت خير دليل على أن التلميحات اللى بـ يقولها الفيلم طوال الوقت كانت في محلها.

الغالبية العظمى من تصوير مشاهد الفيلم تم في مناطق جبلية صحراوية مفتوحة واللى كان له أثر مريح على العين، كنا بس محتاجين زوايا واسعة في التصوير أكثر من كده.. كمان التصوير في الصحراء أكسب ألوان الفيلم تغيير واضح عن نغمة الأزرق والرمادي اللى أصبحت غالبة في معظم ألوان المشاهد في هوليوود حاليًا.

Cop Car قد لا يكون أفضل فيلم تشويق وأكشن شوفناه.. لكن بالمقارنة لميزانيته.. نقدر نقول أنه فيلم ناجح ويستحق المشاهدة.