مصطلح الديستوبيا بيطلق على الأعمال الفنية سواء كانت روايات أو أفلام أو مسلسلات واللي بتناقش فكرة زوال العالم، وفكرة الدمار اللي ممكن يلحق بالعالم، ورغبة البعض في البقاء على قيد الحياة من خلال الكفاح والنضال ضد كائنات أو وحوش أو فامبايرز، والتيمة دي هي البطل في فيلم Daylight’s End.
القصة
الفيلم بيحكي عن الأرض في المستقبل البعيد، مع انتشار مرض يشبه الطاعون، وبيحول العالم ومخلوقاته لناس متعطشة للدماء، وفى وسط كل الدمار والمرض ده بيظهر شخص نصاب بيحرض على مطاردة بعض الأشخاص الناجين من الإصابة بالطاعون، لكن مع الوقت واستمرار الأحداث بيحصل تغير في موقفه وبيقرر يقف في صفهم بدلًا من التحريض ضدهم.
فريق العمل
الفيلم بيقوم ببطولته جوني سترونج ولانس هنريكسن ولويس مانديلور وكريس كيرسون، ومن إخراج ويليام كوفمان وتأليف تشاد لو.
الإخراج والسيناريو والحوار
إخراج الفيلم كان معتمد على فكرة الجمهور الواسع اللي بيحب النوعية دي من الأفلام، علشان كده اعتمد الإخراج على تقديم الأفكار والصور النمطية لأفلام الدستوبيا، وللأسف الإخراج فشل في استغلال نقطة التحول اللي بيحتويها السيناريو الخاص بالأحداث. ودي في رأينا السقطة الكبرى بالنسبة للإخراج.
أما حوار الفيلم فحسينا إنه في كتير من الأحيان متكلف بعض الشيء، وإن كان الحوار في مجمله جيد وقوي.
الموسيقى والديكور
ديكورات الفيلم كانت مميزة ومعبرة. وقدرنا نشعر من خلالها بحجم الدمار اللي في العالم بعد انتشار المرض الغامض. لكن الموسيقى التصويرية كانت ضعيفة وغير مؤثرة بالمرة. وللأسف الموسيقى دايمًا لا يتم الاهتمام بها فيما يتعلق بأفلام الديستوبيا.
الخلاصة
لو كنت من محبي أفلام نهاية العالم في الحالة دي بس Daylight’s End هيعجبك جدًا.
علشان تبقى عارف:
حوالي 2000 مستخدم لموقع IMDBأعطوا الفيلم تقييم 5.3 من 10.