The Definitive Guide to Living in the Capital , Cairo , Egypt

أفلام الرعب اللي بتتناول المصحات النفسية والأماكن اللي بيتحجز فيها المرضى للعلاج، لا تعد ولا تحصى، وتقريبًا أغلب مخرجي أفلام الرعب عدوا على منطقة رعب المصحة العلاجية في حياتهم الإخراجية. وده واضح ومفهوم. المستشفيات بشكل عام مكان مقبض وغير محبوب وبيفكر الناس طوال الوقت بضعفهم، وبالمرض والموت. فما بالكم بالمصحات العلاجية اللي بيعيش الناس فيها لفترات طويلة مع معاناتهم مع المرض وتلقي العلاج؟

مصحة (إلويز) الحقيقية

تم تصوير الفيلم في مصحة (إلويز) النفسية العلاجية الحقيقية. حاولنا ندور على معلومات عن المصحة على الإنترنت، فاكتشفنا إن مافيش مصادر بالعربية عن المصحة إطلاقًا، والمصادر الإنجليزية نادرة، اللهم إلا من صفحة ويكيبيديا اللي عرفنا منها أن المصحة تعتبر واحدة من أكبر المصحات النفسية والعلاجية في العالم في وقت إنشاءها، وإنها كانت عبارة عن مجتمع علاجي كامل بيعيش فيه المرضى، وكانت المصحة بتعتمد على نفسها وعلى زراعة أهلها وعملهم في التغذية والإنفاق عليهم. لدرجة أن المصحة كان لها شرطة خاصة بها ومطافي.

فريق العمل

الفيلم من إخراج روبرت ليجاتو، ومن تأليف كريستوفر بوريللي، أما البطولة فكانت من نصيب إليزا دوشكو وروبرت باتريك وشاس كراوفورد مع مارتن كليببا.

قصة الفيلم

الفيلم بيحكي عن 4 أشخاص بيتسللوا لمصحة (إلويز) علشان يحصلوا على دليل وفاة قريبة أحد أصدقائهم، واللي هيحصل -لو قدر يوصل لدليل الوفاة- على مبلغ ضخم من التركة الخاصة بها. لكن بمجرد دخول الأصدقاء للمصحة، بيواجهوا الماضي الأسود لها، وبيكتشفوا أن المكان مسكون بأرواح، وبيكتشفوا كمان أنهم شخصيًا لهم ماضي له علاقة بالمصحة.

التمثيل والسيناريو والحوار

الأداء التمثيلي للأبطال كان في المنطقة المتوسطة. وده دايمًا بيكون انطباعنا عن الممثلين اللي بتقوم بأدوار في أفلام رعب. لأن مش بيكون مطلوب منهم أكثر من تمثيل الخوف والفزع، والباقي بيكون من مجهود المخرج وفرق التقنيات الخاصة. وبشكل عام أفلام الرعب مش هي الأفلام اللي نقدر من خلالها نحكم أو نختبر الأداء التمثيلي للأبطال.

أما سيناريو الفيلم فكان قوي ومترابط ومفهوم بشكل جيد بالنسبة للمشاهدين، الحوار كان قليل وكان محتاج يكون أقوى شوية، لكن الرعب دايمًا مش بيحتاج غير أقل الجمل الحوارية علشان توصفه. العبرة كلها بتكون بالإخراج والمؤثرات الخاصة.

الإخراج والمؤثرات الخاصة

إخراج الفيلم كان قوي ومترابط بدرجة كبيرة، أما المؤثرات الخاصة فقدرت تضعنا في مواقف مرعبة حقيقية، رغم اعتماد الرعب في الفيلم على المشاهد المفاجئة اللي بتظهر في خلفية المشاهد، أو هجمات الموسيقى المفاجئة.

الديكورات والموسيقى

أما عن الموسيقى فكانت رائعة، وكان القائمين عليها عارفين إمتى يخلوها خافتة علشان نشعر بجرعة الرعب كاملة، وإمتى تتدخل وتقود هي الأحداث بالكامل، وده ينم على ذكاء وحسن استخدام وتوظيف، أما الديكورات فكانت هايلة، ويكفي أن الفيلم تم تصويره في المصحة النفسية الحقيقية.

الخلاصة

فيلم Eloise بيقدم رعب قوي بيخدم الفكرة القائمة على الظهور المفاجئ للأشخاص والأشياء، لكن الفيلم مافيهوش جديد على مستوى القصة أو الأداء التمثيلي.

علشان تبقى عارف: مصحة (إلويز) الحقيقية مغلقة حاليًا ولا تستقبل مرضى.