-
50 سينتآرنولد شوارزنيجر...
-
إثارةحركة ومغامرات...
-
ميكايل هافسترومميكايل هافستروم
-
في1 Cinema
Mohamed Hamdy
الحقيقة أن تحيزنا لفيلم النهاردة منبعه مش بس القصة الكويسة والإخراج الأكثر تميزًا، لكن الفيلم كمان بـ يلمس عندنا حنين طفولي لأيام ما كنا بـ نخرج من المدرسة فى الويك إند نجرى على محلات تأجير أشرطة الفيديو كاسيت علشان نتفرج على أحدث فيلم لسلفستر ستالون أو شوارزنيجر أو غيرهم من الأبطال الشباب –فى وقتها-.
أى شاب فى منتصف أو أواخر العشرينات، يعرف الحنين اللى بـ نتكلم عنه ناحية النجوم الكبار اللى تقدم بهم السن حاليًا، Escape Plan بـ يمثل عندنا الحنين ده وحالة “النوستالجيا” لكل ما هو قديم وجميل فى طفولتنا ومراهقتنا.
من إخراج ميكائيل هافستروم بـ نشوف سيلفستر ستالون فى دور راى بريسلن خبير فى الهروب من السجون واكتشاف الثغرات فى الأنظمة الأمنية، ومؤلف واحد من أشهر الكتب فى المجال، بـ يتورط “بريسلن” فى سجن غير معروف فى الأوساط الأمنية وتابع لجهات أمنية عليا، وبـ يكون عليه أنه يهرب من السجن اللى من المستحيل الهرب منه بمساعدة أرنولد شوارزينجر، الأمر اللى بـ يفجر عدد لا نهائى من المغامرات اللى بـ تحبس الأنفاس بالمعنى الفعلي للكلمة.
الفيلم فكرنا بفيلم قديم شوية –بما أننا بـ نتكلم عن ذكريات الطفولة– اسمه Tango & Cash ومن إنتاج 1989 وبـ يحكى عن محاولة شرطيين (منهم ستالون برضه) الهرب من السجن لإثبات برائتهم من التهم اللى تم الزج باسمهم فيها بدون دليل حقيقى.
مستوى الأكشن فى الفيلم كان أكثر من رائع، على الرغم من بعض المغالطات أو اللى بـ نسميه –الأداء الأسطوري– بمعنى إظهار الأبطال كأساطير لا يمكن أنهم يصابوا بسوء، إلا أن المستوى العام للفيلم ممتاز، وبالفعل قضينا حوالي ساعتين متوحدين تمامًا مع أبطال العمل، إلا الدور الثاني اللى تم إسناده لدور سجين مسلم.
للأسف معلومات هوليوود لما تطورت عن الإسلام والمسلمين، لسه مش قادرة تفصلهم عن الإرهاب، لاحظنا فى أكثر من فيلم استعمال كلمة “السلام عليكم” للدلالة على الإرهاب رغم معنى الكلمة باللغه العربية، كمان شوفنا مفاهيم خاطئة تمامًا عن الإسلام كديانة، بحيث أن أى طفل فى ابتدائي ممكن يمسك أخطاء دينية كثير فى الفيلم.
الدويتو الفني بين نجمين كبار كان متميز، والدور كان متوزع كويس جدًا بينهم، والفيلم بشكل عام كان متميز وننصحكم تشوفوه لو من عشاق المغامرات ذات النكهة المختلفة.