The Definitive Guide to Living in the Capital , Cairo , Egypt

معظم صناع الأفلام، بيستغلوا المشاهد الافتتاحية في أفلامهم، علشان يعرفونا الأحداث اللي أدت للقصة الأساسية اللي بيتناولها الفيلم. سواء من خلال استعراض مشاهد سريعة، أو من خلال التعليق الصوتي. ودي تقنية شوفناها كتير خصوصًا في أفلام نهاية العالم أو الـ (ديستوبيا) علشان يحصل تمهيد جيد للمشاهدين.

لكن في حالة Finch، فيلم الخيال العلمي اللي بيقوم ببطولته توم هانكس وبيتعرض حصريًا على منصة Apple TV Plus مش بنشوف أي تمهيد يوضح لنا إزاي انتهت الحياة على كوكب الأرض، ومش بنعرف القصة بالكامل غير في النصف ساعة الأخيرة تقريبًا من الأحداث.

رهان ذكي وخطير في نفس الوقت، قرر من خلاله المخرج ماجويل سابوتشينك يقدم لنا أحداث تشدنا كمشاهدين ويخلينا نستحمل عدم فهم ١٠٠٪ من الأحداث لحد الوقت المتأخر ده. الرهان ده لو كان فشل كان هيخلي المشاهد مش مستحمل يتفرج على دقيقة كمان بدون ما يفهم. وكان ممكن يؤدي لفشل الفيلم تمامًا.

لكن الحقيقة أننا مع Finch حسينا أن الرهان كسبان جدًا. وأن الفيلم اتعمل بحرفية رائعة أجبرتنا على المتابعة، ومحاولة البحث عن أجوبة بين سطور الأحداث. ودي حيلة ذكية، المبدأ فيها إنك ما تعتبرش المشاهد طفل بتحكي له الأحداث بالتفصيل، وتسيبه يدور بنفسه ويركز مع كل مشهد.

Finch بيحكي عن كارثة بتدمر الحياة على الأرض، أو على أقل تقدير، بتغيرها بنسبة ١٠٠٪. الكارثة ما قتلتش كل البشر، لكنها خلتهم يتقاتلوا على الموارد، على حسب جملة بيقولها توم هانكس في حوار الفيلم، وده كان فيه إسقاط رائع على فكرة إن أكبر مشاكلنا بتيجي من تصرفاتنا الغلط قبل ما تكون من الكوارث الطبيعية اللي بتحصل غصب عننا.

من هنا بنبدأ نتعرف على شخصية Finch. الشخصية الرئيسية في الفيلم، وهو واحد من ناس قليلة فضلت على قيد الحياة بعد الكارثة، بس واضح أن تأثير الكارثة دي عليه كان شبه قاتل. علشان كده بيبدأ يبتكر إنسان آلي علشان ياخد باله من الكلب بتاعه لو هو نفسه مات.

من هنا بتتضح الخدعة التانية في الفيلم. إحنا هنا مش قدام فيلم خيال علمي عن محاولة النجاة من كارثة. إحنا بنشوف فيلم عن الصداقة، وتأثيرها على الناس، والتضحيات اللي ممكن نعملها علشان أصحابنا. والغريب أن محور الصداقة هنا مش الصداقة بين Finch والكلب بتاعه. لكن كمان بينه وبين الإنسان الآلي (جيف). واللي اتجسدت على الشاشة باحترافية خلتنا مش قادرين نمسك دموعنا في بعض المشاهد.

ولما ننسجم في الأحداث ونحس أن فيلم Finch مش هيقول رسايل أكتر من اللي قالها، بيرمي الفيلم لينا الكارت الأخير، لما بنشوف  ندم Finch على أنه ماراحش الأماكن اللي كان عاوز يروحها، وتعلل بالشغل والمسئولية وأنه مش وقته. لحد ما فات الأوان. دي رسالة بتقول لنا أننا لازم نستغل كل لحظة في حياتنا، قبل ما يفوت الوقت.

أحلى مافي Finch -بعد تمثيل توم هانكس الرائع طبعًا- هي أن كل رسائل الفيلم بنفهمها من السياق، مش بتتقال بشكل مباشر وغبي، حتى الرسالة المهمة اللي بتحذر من إهمالنا للبيئة وابتعادنا عن مصادر الطاقة النضيفة، كل الكلام ده محطوط في إطار درامي مؤثر جدًا وشبه مش ملحوظ. وهي دي أحلى حاجه في السينما.. الرسالة الخفية.

أخيرا.. ممكن تشوف Finch على أنه فيلم Cast Away لكن في عالم حصلت فيه كارثة طبيعية. وممكن تشوفه فيلم عن الصداقة بين إنسان وكلب وروبوت! وممكن تشوفه فيلم عن الفرص الضايعة في حياة البشر.. الفيلم قابل للمشاهدة بأي صيغة. لكن في كل الأحوال ومهما كان استقبالك للفيلم.. هتنبسط.. وهتتأثر.. وهتتفاعل مع الأحداث من أول مشهد للنهاية.