The Definitive Guide to Living in the Capital , Cairo , Egypt

أهلاً بكم فى لوس أنجلوس… لوس أنجلوس فى زمن العصابات حيث “ميكى كوهين” هو الكل فى الكل… تجارة مخدرات ودعارة وكل ما هو قانونى وغير قانونى بـ يحصل فى السر والعلن وبمساعدة رجال الشرطة الفاسدين وبسبب خوف رجال الشرطة غير الفاسدين.
أهلاً بكم فى لوس أنجلوس.. مجموعة من ضباط الشرطة الشرفاء، بمساعدة عشيقة “ميكى كوهين” بـ تحاول توقع الأخير فى شر أعماله، بالقانون، أو حتى بدون قانون، السؤال اللى كل أبطال الفيلم بـ يطرحوه خلال الأحداث: هل من حق رجل القانون أنه يخرج بره سياق القانون لبعض الوقت علشان يحقق أهداف تدور كلها فى إطار القانون؟

الفيلم فى مجمله مش بـ يقدم لنا حاجة جديدة عن عالم العصابات والتصدى لها، القصة مكررة فى أكثر من عمل أدبى وفنى آخر، لكن كان عندنا بعض الفلتات زى مثلاً أداء الرائع شون بن اللى قدر يغير شخصيته بالكامل ويظهر بصورة رجل عصابات أمريكى حقير بالمعنى الحرفى للكلمة.
البطولة النسائية لإيما ستون كانت ممتازة رغم وقوف الرقابة المصرية ضدها فى كثير من المشاهد اللى تم اقتطاعها بالكامل.

لو بـ تحب أفلام العصابات والأكشن المتعلق بها والمدافع الرشاشة القديمة الضخمة والسيارات العتيقة اللى بـ تنقلب وتنفجر على قارعة الطريق Gangster Squad هـ يكون فيلم مثالى بالنسبة لك، أما لو بـ تدور على حاجة مختلفة ننصحك تتابع باقى المقالات النقدية وتشوف فيلم مناسب أكثر لك.