The Definitive Guide to Living in the Capital , Cairo , Egypt

يبدو أن هوليوود لما قامت بإعادة إنتاج كل أعمالها القديمة تقريبًا، بدأت تحاول تعيد إنتاج أفلام مستمدة من ثقافات وشعوب تانية. وفي واقع الأمر مافيش أي مضايقة من الفكرة دي بل على العكس السينما تعتبر من أهم أدوات التبادل الثقافي والتعارف بين الأمم والشعوب، لكن المفروض لما هوليوود تقتحم العالم الثقافي والفني لدولة تانية، يكون ده مبني على أساس فني واضح، مش مجرد نقش فني زي اللي حصل في حالة Ghost In The Shell.

القصة

الفيلم بيحكي عن قصة إنسانة ألية لها عقل بشري، أو (سايبورج) زي ما بيتم تسميتها في القصص المصورة اليابانية، واللي بتحاول تهاجم مخطط لشركة تانية بيحاول يقضي على وجود باقي الـ(سايبورج) من خلال مجموعة من العمليات الخاصة اللي بنشوفها خلال أحداث الفيلم.

الفيلم بيبدأ ببعض التلميحات لماضي الشخصية الرئيسية (ميجور)، ومن ثم بنبدأ نشوف العمليات اللي بتقوم بيها حاليًا، وبتتقاطع باقي مشاهد الفيلم بعد كده ما بين ماضي (ميجور) وإزاي اتحولت لسايبورج، وبين حياتها الحالية، ومدى أحساسها بالألفة مع المهام اللي بتقوم بها، ومع شعورها كإنسانة.

فريق العمل

فيلم Ghost in The Shell من إخراج روبرت ساندرز، ومن تأليف جايمي موس، أما بطولة الفيلم من نصيب سكارليت جوهانسون وجوليت بينوش ومايكل بيت مع تاكيشي كيتانو.

ومن الواضح أن سكارليت جوهانسون لسه مش قادرة تخرج من الجو العام الخاص بفيلم  Lucyخاصة مع النجاح الكبير اللي الفيلم قدر يحققه، وقررت أنها تقوم بزيارة جديدة لعالم مشابه لعالم الفيلم السابق. لكن المختلف بين فيلم  Lucy وبين Ghost In The Shell هو الجانب الفلسفي، واللي كان حاضر بقوة في Lucy وكان شبه غائب للأسف في Ghost In The Shell.

الإخراج والأداء التمثيلي

على الرغم من ضعف إخراج الفيلم وشعورنا بالتوهان مابين رغبة صناع الفيلم في التشبه بعالم قصص المانجا اليابانية (المانجا هي أسلوب رسم القصص المصورة اليابانية) وبين محاولة تقديم فيلم هوليوودي بيتمحور حول الأكشن ومشاهد تبادل إطلاق النار، إلا أن الأداء التمثيلي خاصة لسكارليت جوهانسون كان قوي وجذاب، وكأنها عارفة المطلوب منها بنسبة 100% وبتقدمه بشكل احترافي جدًا على الشاشة.

المؤثرات والموسيقى والديكور

لازم نعترف أن المؤثرات الخاصة بالفيلم كانت أكثر من رائعة، وخاصة مشاهد الاشتباك والصراع واللي تم المزج فيها بين مشاهد الخدع ومشاهد الحركة الحقيقية باحترافية معروفة عن أفلام هوليوود، وبإبهار مميز وأكثر من رائع. لكن الموسيقى التصويرية واللي بتميز أعمال الأنيميشن الياباني دائمًا، كانت غايبة بنسبة 100% عن أحداث الفيلم، على الرغم من أن إضافتها كانت هتعمل تأثير مضاعف للمؤثرات الخاصة والديكورات اللي كانت تائهة مابين الجو الياباني والعالم الأمريكي.

الخلاصة

فيلم Ghost In The Shell فيلم هوليوودي بيحاول يتقمص دور الأنيميشن الياباني، لكنه فشل في النقطة دي فشل ذريع. لكن لو هتشوف Ghost In The Shell كفيلم أجنبي منفصل ممكن يعجبك.

 علشان تبقى عارف:

الفيلم مبني على فيلم رسومي ياباني (إنمي) يحمل نفس الإسم وأنتج في عام 1995.