The Definitive Guide to Living in the Capital , Cairo , Egypt

عالم هوليوود الجميل، والأفلام وكواليسها وستوديوهات التصوير، عن كل ده وأكثر بـ يدور فيلم Hail, Caesar! اللى أخرجه وألفه إيثان كوين، ومن بطولة جورج كلوني وسكارليت جوهانسون وجوش برولين مع مشاركة من جونا هيل.

الفيلم بـ يصحبنا فى عالم وكواليس صناعة أفلام هوليوود فى الخمسينيات، وإزاي بـ يتم إدارة الستوديوهات الضخمة فى هوليوود بالشكل اللى يسهل إخراج الأفلام بالشكل اللى بـ نشوفه على الشاشة فى النهاية.. لكن الفيلم بـ يقول أن الدنيا مش بـ تبقى بالوردية اللى بـ نشوفها فى الأفلام!

الفيلم بـ يحكي عن التناقضات فى الشخصيات اللى بـ تظهر على الشاشة بأدوار طيبة وجميلة، لكن فى الأصل الشخصيات دي عندها مشكلات كبيرة مع الإدمان على الكحول مثلًا أو التورط فى علاقات غير مشروعة، وأحيانًا أعمال غير مشروعة كمان!

الفيلم بـ ينقسم لأكثر من قطاع، كل منهم ممكن يكون منفصل تمامًا عن الثاني، وبـ يجمع بينهم فى النهاية جوش برولين اللى بـ يحاول يحل كل المشكلات اللى بـ تظهر أمامه، وفى نفس الوقت بـ يحاول يوصل لقرار فى عرض قُدم له بتغيير وظيفته لوظيفة فى عالم الطيران بدلاً من عالم السينما.

دور سكارليت جوهانسون وجونا هيل كان محتاج يكون أكثر وأطول، وكان ممكن يخرج من الفنانين بالحجم ده مساحة أكبر من الأداء التمثيلي وقدرة أفضل من كده على تقديم دور أكبر فى الفيلم، لكن يبدو أن الإخراج كان مش مهتم بهم على حساب باقى  الأبطال فى الفيلم.

الموسيقى التصويرية كانت جميلة ومتميزة، يمكن مش قوية بالشكل اللى كنا نتوقعه، لكن تظل جيدة ومعبرة عن فترة الخمسينيات اللى بـ يدور فيها أحداث الفيلم، كمان الحالة الكوميدية فى الفيلم كانت قوية جدًا وضحكنا أكثر من مرة على مواقف كثير تم  وضعها وكتابتها فى الفيلم بذكاء وتوظيفها بشكل يخدم أحداث الفيلم.

عالم هوليوود، والباب الخلفي اللى بـ يقدم لنا الأفلام اللى بـ نشوفها وبـ تعجبنا يستحق نتكلم ونحكي عنه أكثر من كده، لكن المرة دي إحنا أمام فيلم هوليوودي بـ يقول لنا أن اللى بـ يظهر على الشاشة مش دايمًا حقيقي، وأن كواليس هوليوود الحقيقية مش بنفس البريق والإشراق اللى بـ يظهر لنا على الشاشة.