-
مالالا يوسافزاي
-
وثائقي
-
ديفيد جوجنهايمديفيد جوجنهايم
-
في1 Cinema
Mohamed Hamdy
بقى لنا فترة طويلة ما شوفناش فيلم وثائقي بالجمال ده.. أو التركيز ده.. أو القدرة دي على حكي قصة ملخصة وبسيطة من خلال مجموعة من المشاهد المترابطة والحوار اللى بـ يوضح كل شىء.. وثائقي متعوب عليه ويستحق المشاهدة والتقييم من كل محبي الأفلام الوثائقية.
الفيلم اللى أخرجه ديفيس جوجنهايم بـ يحكي عن البنت الباكستانية الصغيرة "مالالا يوسفازي" واللى بـ تصر على الذهاب للمدرسة على الرغم من قيام حركة طالبان بالسيطرة على مقاليد الأمور ومحاولتهم منع تعليم البنات، فى سبيل منعها من توصيل صوتها، حاولت حركة طالبان اغتيالها.. اعترض طريقها شخص مسلح وأطلق الرصاص على رأسها مباشرة.. لكن الطلقة ما قتلتهاش.. على الرغم من تسببها لها فى مشاكل صحية كثيرة وعدم قدرتها الكاملة على تحريك نصفها الأيمن إلا بشكل بسيط، إلا أن مالالا صممت أنها تكمل كفاحها وتستمر فى رحلة تعليمها بمساعدة والدها الشجاع.
الفيلم بـ يستعرض إزاي بدأت مالالا كتابة يومياتها لحساب موقع BBC كيوميات بنت بـ تسعى للتعليم فى منطقة ملتهبة ممكن يحصل فيها أي كارثة فى أي وقت خاصة مع بداية استهداف طالبان للمدارس وحافلاتها اللى بـ توصل البنات علشان يتعلموا، الأمر اللى عرض مالالا لهجوم ثاني كان هـ يقتلها المرة دي.
الفيلم كمان بـ يستعرض اهتمام وسائل الإعلام بقصة مالالا والهيئات الدولية اللى بدأت تتعاون معاها وتمنحها الجوائز، لكن أهم جائزة كانت جائزة نوبل طبعًا واللى سعيت مالالا أنها تحصل عليها، لكن هل هـ تحصل فعلًا على أهم جائزة فى العالم ممكن تمكنها من تحقيق حاجات كثير لبنات باكستان؟ الفيلم بـ يبدأ بتصوير حياة مالالا بشكل طبيعي وتقليدي، مش بـ يحاول يظهرها بأكثر من كونها طفلة صغيرة بـ تلعب مع أخواتها وبـ تحاول تذاكر دروسها، بعدين بـ يبدأ فى التركيز على علاقتها بوالدها، العلاقة اللى ممكن يعتبرها الكثير استغلال من الأب لقضية ابنته، والبعض الآخر ممكن يشوفها شجاعة من الأب فى التعامل مع حركة مسلحة مش بـ تفهم غير القتل.
على الرغم من شعورنا بالملل فى منتصف الفيلم، إلا أن بداية ونهاية الأحداث امتازوا بقوة وقدرة على الجذب، وعلى الرغم من الإطالة فى منطقة منتصف الأحداث إلا أن باقى الأحداث كان رتمها أسرع وأكثر قدرة على جذبنا وخلانا نشعر بأهمية القضية اللى بـ تدافع عنها مالالا.
فيلم He Named Me Malala واحد من أهم وأقوى الأفلام الوثائقية واللى بـ يلقي الظل على قضية ناس كثير بـ تعتبرها من المسلمات فى المجتمعات بتاعتها، علشان كده جاء الوقت اللى نكتشف فيه كفاح بنت صغيرة فى وجه أصعب وأقوى منظمة مسلحة فى المنطقة تقريبًا.