The Definitive Guide to Living in the Capital , Cairo , Egypt

لعشاق الدخول فى تجربة سينمائية مبهرة وجديدة، الأفلام البحرية اللى بـ تدور أحداثها فى مساحات مفتوحة من البحار أو المحيطات لها أفضلية عندنا، ولو أضفنا للأفضلية دي حبنا للأفلام اللى بـ تتناول قصص الكفاح للبقاء على قيد الحياة وإزاي الإنسان ممكن يكافح ويقاتل فى سبيل الحفاظ على حياته.. لو حطينا كل الأمور دي جنب بعضها هـ نقول أن فيلم In the Heart of the Sea واحد من أفضل أعمال السنة، لأنه بالإضافة لكل ما سبق قدر يوظف المؤثرات الخاصة وتقنيات العرض السينمائي لصالحه.. لكن الحقيقة الفيلم لا يرتقي لمستوى أفضل الأفلام خلال السنة.

من إخراج رون هاورد وبطولة كريس هيمسورث وبنجامين ووكر وجوردي مولا وسيليان ميرفي بـ نشوف قصة مجموعة من البحارة بـ يكافحوا للبقاء على قيد الحياة، بعد تعرضهم لهجوم من حوت متوحش أثناء أحد رحلاتهم الخاصة بالصيد، الأمر اللى بـ يضعهم فى مأزق بـ يحاولوا بكل طريقة يخرجوا منها بحياتهم.. فى منطقة خطيرة من المحيط.

الجزء الأول من الفيلم بـ يحاول يشرح ويكون العلاقات بين الأفراد وبعضهم البعض، والمفروض أنه بـ يبني عندنا الجزء العاطفي اللى هـ نعتمد عليه بعد كده كوقود للبقاء مترقبين ومهتمين بمعرفة الأحداث للنهاية، خاصة لو عرفنا أن الفيلم مستوحى بالفعل من أحداث حقيقية.. لا ننكر شعورنا بالملل من بعض المناطق فى الجزء الأول من الأحداث، لكن بشكل عام مستوى الجزء الأول كان أفضل بكثير من الجزء الأول من فيلم زي Everest على سبيل المثال، واللى كان كله ممل وغير متزن أو متناسق مع باقى الأحداث.

بعد كده بـ ياخدنا الفيلم لرحلة مثيرة تم توظيف التقنيات الحديثة للتصوير والعرض السينمائي لإنتاجها بأفضل شكل ممكن، والحقيقة أننا مش حابين نحرق الأحداث أكثر من كده لكن المهم أنكم تعرفوا أن الفيلم بـ يقدم ملحمة حقيقية فى الصراع البشري للبقاء على قيد الحياة، ويكفى أنكم تعرفوا أن أبطال الفيلم اتبعوا دايت قاسي علشان يظهروا بمظهر البحارة اللى بـ تناضل للبقاء على قيد الحياة.

الأداء التمثيلي للممثلين كلهم كان بـ يقع فى منطقة الـ "متوسط/ جيد" بدون أي تمثيل مبالغ من أي بطل، فى رأينا إحنا شايفين كريس هيمسورث فى محاولة ناجحة منه للخروج من شخصية Thor اللى كنا خايفين من أنه يظل حبيس فيها طوال حياته التمثيلية، باقى الأبطال أداؤهم كان جيد برضه، وإن كان الفيلم نفسه مش بـ يركز على منطقة الصراع اللى بـ يتم التركيز عليها فى التريلر، واللى يبدو أن صناعه قرروا جذب المشاهدين بمشاهد الصراع، بينما التركيز الأساسي للفيلم على القصة الإنسانية لطاقم السفينة والعلاقات اللى بـ تجمعهم ببعض.

عشاق الأفلام البحرية، والأفلام المنتجة بميزانيات ضخمة وعوامل إبهار فى الصورة، أكيد هـ يعجبهم In The Heart Of The Sea وهـ يخلي زيارتهم للسينما تستحق كل جنيه مدفوع فى ثمن التذكرة، وكل دقيقة فى مشاهدة الفيلم.