The Definitive Guide to Living in the Capital , Cairo , Egypt

بقى لنا كتير نفسنا نشوف فيلم رعب فكرته جديدة ومختلفة عن باقي أفلام الرعب المتداولة واللي أصبحت مكررة الحبكة محفوظة القصة مُعادة من حيث الأداء التمثيلي والديكور والموسيقى.. ونقدر نقول بثقة إن Incarnate فيلم مختلف من حيث الفكرة والتنفيذ.. وهنعرف ليه لما نقرأ المقال ده للآخر.

فيلم Incarnate من بطولة مارك ستيجر، بريان هالي، توماس أرانا، كير أودونيل، مع كارولينا ويدرا، ومات نابلي، والفيلم من إخراج براد بيتون، وتأليف روني كريستينسن.

الفيلم بيحكي عن رجل قعيد، عنده قدرة خارقة على الدخول لعقول البشر الممسوسين بمخلوقات شيطانية.. ومن خلال القدرة دي بيقدر يطرد الأرواح الشريرة من الناس الممسوسة. لكنه بيتعرض لتحدي من أحد الشياطين، واللي بيتجسد في طفل عنده حوالي 11 سنة، وبيحول حياته وحياة أسرته لجحيم لا يطاق.

في جانب كبير من الفيلم افتكرنا فيلم تاني لا يمت للرعب بصلة، وهو فيلم Inception من بطولة ليوناردو ديكابريو، وهو في رأينا واحد من أفضل أفلام السينما وأكثرها تعقيدًا وتحفيزًا للعقل على التفكير والتمعن، والحقيقة إن فيلمنا واخد خيوط كتيرة من Inception وإن كان مش بنفس التركيز والتمعن.

الفيلم مش بيقدم مشاهد رعب كتيرة ومكثفة، لكن المشاهد اللي قدمها كانت كفيلة ببث الرعب في قلوب المشاهدين، وعلى المقابل قدم مشاهد أكثر تحديًا للعقل وأكثر إشغالًا له، بشكل نقدر نقول أنه بيقدم نوع من الرعب اللي له أساس علمي أو الرعب المختلط بمسحة من الخيال العلمي.

الموسيقى التصويرية لعبت دور مهم وحيوي في الأحداث، وتجلت في مشاهد الرعب علشان تقدم لنا التجربة كاملة ومتميزة ومخيفة إلى أقصى حد، أما الديكورات فكانت متواضعة مقارنة بالموسيقى وباقي عناصر الفيلم بشكل عام.

الأداء التمثيلي للأسف ماكانش بقوة القصة والحبكة، ولو كان القائمين على الفيلم اختاروا طاقم تمثيلي أكثر احترافية كان ممكن يكون للفيلم شأن أقوى بكتير من اللي شوفناه في النهاية.

فيلم Incarnate بيقدم رعب بفكرة جديدة، ننصح بمشاهدته في برودة ديسمبر، اللي هيزودها برودة الرعب في الفيلم، ومخاطبته دماغ المشاهد قبل غريزته وخوفه الفطري من الأشباح والأرواح.

علشان تبقى عارف: تصنيف الفيلم على موقع IMDB المتخصص في مقالات الأفلام 5.2 من 10 وشارك فى الإستفتاء على الفيلم حوالى 2000 مستخدم للموقع.