The Definitive Guide to Living in the Capital , Cairo , Egypt

على الرغم من التريلر والجو المرعب اللى بـ يوحي به وبـ يحاول يعكسه فى كل ثانية من ثواني الإعلان التشويقي للفيلم، وعلى الرغم من تلهفنا على فيلم رعب بـ يعكس أجواء "نقيضة لبابا نويل" وشعورنا أن الفيلم بالفعل ممكن نخرج منه بشىء أكثر قوة وتميزًا عن باقى أفلام الرعب والتشويق، إلا أن للأسف النتيجة النهائية كانت مخيبة للآمال.. لأن حتى الفيلم ما قدمش المستوى التقليدي البسيط للرعب العادي اللى متعودين عليه!

من تأليف وإخراج مايكل دورتي، ومن بطولة آدم سكوت وتوني كوليت وكونشاتا فيريل وديفيد كيكنير بـ نشوف قصة اجتماع عائلي بمناسبة الكريسماس، مع أجواء دافئة وحميمية ولا يفسدها سوى شقاوة الأولاد الصغيرين، وهى نفس الأجواء اللى شوفناها فى فيلم زي Home Alone خاصة بدايات الجزء الأول منه.

الأمور بـ تتطور لما بـ تحصل خناقة بين الأولاد الصغار، وواحد فيهم بـ يهين فكرة "بابا نويل" والأمل فى الغد الموجود فى الفكرة دي، الأمر اللى بـ يستدعي شيطان رجيم اسمه Krampus بـ يهدد الأسرتين المجتمعتين وبـ يسحب الفيلم لمساحة ومنطقة من الغموض والرعب والمواجهة بين العائلة وبين Krampus الشرير وأتباعه الغرباء.

للأسف يا ريت الفيلم ما دخلش منطقة الرعب، لأنه فشل فى تقديم الرعب الكوميدي المعتمد على الإيفيهات أو حتى المشاهد المرعبة واللى لها طابع كوميدي فى نفس الوقت، وكمان الفيلم فشل فى تقديم الرعب الحقيقي الخاص بأفلام الرعب العادية، لأن مستوي الفيلم ما وصلش لمستويات الرعب دي، ولحرص القائمين على الفيلم على الخروج به فى منطقة التصنيف العائلية بعيدًا عن تصنيفات الكبار فقط لحصد نسبة مشاهدة أعلى خاصة أن الفيلم بـ يتم عرضه فى موسم الكريسماس.

الجرافيكس والمؤثرات الخاصة كانت قوية ومتميزة، خاصة المشاهد اللى بـ يتم المزج فيها بين الواقع والحقيقة وبين المؤثرات الخاصة بطريقة متميزة وجديدة وحسستنا بالجهد المبذول فى إخراج المشاهد دي بشكل قوي وجديد، لكن شىء زي الموسيقى التصويرية مثلاً كانت ضعيفة وعلى غير المستوى وغير مؤهلة أنها تكون الموسيقى التصويرية الخاصة بفيلم رعب المفروض أنه مرعب.

الأداء التمثيلي بقى اللى كان سىء جدًا للأسف، ومع أخطاء قاتلة للسيناريو جعلت أحد المشاهد بـ يظهر فيه Krampus وهو بـ يخطف أحد الأطفال، وفى المشهد الثاني بـ يقف أبوه يتكلم مع والدته عن ندمه على اختطاف ابنه بدون أي رد فعل حقيقي على أرض الواقع! ياللهول!

Krampus فيلم بـ يتأرجح بين الرعب والتشويق والإثارة، ننصحكم به لو كنتم من محبى مشاهدة الأفلام فى المواسم بتاعتها زي الكريسماس وغيرها.