The Definitive Guide to Living in the Capital , Cairo , Egypt

عالم الشر والجريمة له خصوصية محببة للنفس البشرية.. خصوصية بـ تخلي الناس مهتمة وحابة أنها تتفرج على أفلام الجريمة، وخاصة اللي بـ تحكي قصص حقيقية لمجرمين سببوا أذى ومشاكل كبيرة في الماضي.. وتحولت حياتهم لقصص ألهمت صناع الأفلام في هوليوود.

من إخراج بريان هليجلاند وبطولة كريستوفر أليكستون وديفيد ثيوليز وتوم هاردي وإيميلي براونينج بـ نشوف قصة التوأم المجرم رونالد وريجنالد كراي واللي قلبوا حياة أهل لندن جحيم في الستينيات نتيجة جرائمهم المتعددة ونفوذهم اللي فاق الحد.

توم هاردي قام بدور التوأم رونالد وريجنالد، الأمر اللي أعطاه فرصة قوية وكاملة أنه يفجر كامل طاقته الإبداعية ويورينا إزاي هـ يقدر يقوم بشخصيتين، الأولى عنيفة ومتهورة وصدامية إلى أقصى مدى مع الجميع، والثانية شخصية جميلة شكلًا وموضوعًا وتتسم بالهدوء والرزانة والقدرة على الثبات الانفعالي حتى في أحلك المواقف. بـ نعتقد أن أفضل ما في الفيلم هو حالة التضاد بين الشخصيتين، واستمتعنا بمشاهدة توم هاردي وهو بـ يغير أداؤه على مدار اللحظة بين الشخصيتين، ونعتقد أن الفيلم كان بمثابة صراع حقيقي بالنسبة له في قدرته على الحفاظ على خط واضح وثابت لكل شخصية مع تغيراتها في سيناريو الأحداث.

بـ نعيب على الفيلم اهتمامهم بشخصية الأخين التوأم وبأداء هاردي على حساب كل شىء آخر.. بمعنى أننا حسينا أنهم بـ يقولوا لنا من بين أحداث الفيلم: إحنا قدمنا لكم أداء تمثيلي متميز وشخصيتين متناقضتين.. عاوزين إيه ثاني! والحقيقة أننا كنا نتوقع الأكثر بالفعل! كنا نتوقع الأكثر على صعيد الموسيقى مثلًا، اللي ما كانتش بنفس القوة اللي كنا نتوقعها أو ننتظرها في فيلم زي ده، خصوصًا أن الديكورات تميزت وتألقت وقدمت عرض ممتاز متناسق مع الفترة الزمنية اللي بـ يدور فيها الفيلم بدون أي أخطاء نقدر نلاحظها، وكأننا انتقلنا بآلة الزمن لفترة الستينيات اللي بـ يتكلم عنها الفيلم.

الفيلم تميز بلمسة ساخرة بـ تميز أحداثه، وميل لوضع بعض المشاهد أو الجمل الحوارية اللي لها طابع ساخر أو كوميدي في قمة مشاهد العنف والدم والصراع اللي في الفيلم، وده كان من الأمور المحببة بالنسبة لنا واللي ميزت أسلوب المخرج بريان هليجلاند.

لو حبينا نختصر المقال النقدي بتاعنا في كلمتين هـ يكون: فيلم Legend مش أسطورة قوي.. لكن أداء توم هاردي كان أقرب ما يكون للأسطورة.