The Definitive Guide to Living in the Capital , Cairo , Egypt

من المميز في أفلام هوليود، قدرتها على إعادة إنتاج الأعمال القديمة، وبث الروح فيها من جديد بعد ما نظن أنها خلاص انتهت ومافيش جديد يمكن تقديمه.

فيلم Logan من تأليف مايكل جرين وإخراج جيمس مانجولد، ومن بطولة هيو جاكمان وباتريك ستيوارت مع دافني كيين ورينالدو جاليجوس.

الفيلم بيستكمل أحداثه من نهاية سلسلة أفلام X men واللي كانت بتتناول قصة مجموعة من الأبطال الخارقين اللي كل واحد فيهم كان عنده قدرات خاصة بيستعملها لخدمة الخير ضد فرق من الأشرار اللي بتحاول تقضي عليهم في سعيهم للسيطرة على العالم.

للأسف الناس اللي لم تتابع السلسلة القديمة هيكون من الصعب عليها متابعة فيلم Logan، علشان كده بننصح اللي عاوز يتابع فيلم Logan ويفهم كل تفاصيله أنه يشوف سلسلة الرجال إكس في البداية.

بتدور أحداث الفيلم في المستقبل، وتحديدًا سنة 2029، وبيستعرض الفيلم قصة البروفيسور إكس اللي بيقوم بدوره باتريك ستيوارت واللي كان مدير مدرسة الأطفال الخارقين، واللي بيعيش آخر أيامه في محاولة للسيطرة على النوبات اللي بتصيبه كل شوية، بمساعدة هيو جاكمان أو وولفرين اللي بيتمتع بقوة خارقة لكنه بيحاول يداريها ويعيش بشخصية (لوجان) اللي بيقود سيارة ليموزين بيخدم بيها الناس مقابل أجر زهيد.

الفيلم بيستكمل أحداثه بعد كده لما بتظهر بنت خارقة للعادة، وبتتمتع بقدرات وولفرين الخارقة، وبتعتبر البنت دي الأمل الأخير لإنتاج جيل جديد من البشر الخارقين، لكنها مش هتقدر توصل لأهدافها بدون مساعدة وولفرين.

المميز في الفيلم هو قدرته علي إعادة إحياء السلسلة من جديد، وبث الروح فيها وبداية التهيئة لسلسلة جديدة من الأحداث بتستمر بأبطال جديده، وعرفنا من الأخبار أن هيو جاكمان بيقدم آخر أدواره في السلسلة، خاصة مع انشغاله بمشاكله الشخصية وإصابته المتكررة بسرطان الجلد.

علي الرغم من طول الفيلم زمنيًا (حوالي ساعتين وربع) إلا أننا لم نشعر بالملل، نتيجة الأحداث المتسارعة والأكشن المتميز، والإخراج الرائع لمشاهد المطاردات، بالإضافة للسيناريو القوي المترابط واللي قدر يعجب المتابعين القدامى للسلسلة، والمشاهدين الجدد اللي عاوزين ينضموا لقائمة محبي الرجال إكس.

تصنيف الفيلم الأمريكي هو R، وهي أعلي درجة من درجات تصنيف الأفلام في الولايات المتحدة، والحقيقة أننا متعودين أن أفلام الأبطال الخارقة يكون تصنيفها أقل من كده بكتير، لكن كمية الدماء والعنف في الفيلم جعلت الفيلم يحصل علي تصنيف عالي، وواضح أن دي هتكون موضة جديدة في أفلام الأبطال الخارقين خاصة بعد فيلم Deadpool.

الموسيقى التصويرية للفيلم كانت قوية ومؤثرة، وقدرت تنقلنا لعالم المستقبل اللي بتدور فيه الأحداث، كمان الديكورات كانت مميزة لكن كان عندنا شعور أنها بتنتمي زمنيًا لحقبة زمنية في الماضي ومش في سنة 2029 زي ما بيقول الفيلم، ويمكن صناع الفيلم كان قصدهم أن الحنين للماضي هيكون ثقافة وأسلوب في المستقبل.

فيلم Logan فيلم بيجهز المشاهدين لسلسلة قوية ومؤثرة، وهنكون من المتابعين الأقوياء لباقي أجزاء السلسلة اللي بتوعدنا بمستوى متميز من الأكشن والإثارة.

علشان تبقي عارف:

كلُ من النجمين (هيو جاكمان) و(ريتشارد جرانت) بدأ حياته الفنية من خلال فيلم عن مصاصي الدماء، حيث شهدنا جاكمان في فيلم (Van Helsing) عام 2004، بينما جرانت بدأ في فيلم (Bram Stoker’s Dracula) عام 1992