The Definitive Guide to Living in the Capital , Cairo , Egypt

أفلام الرعب والأكشن بـ تستمد أحداثها فى الغالب من أمور بسيطة، أمور ممكن تحصل لأي شخص عادي فى أى وقت أو مكان، ومن هنا بـ تكتسب البعد الإنساني اللى بـ تخلى أحداثها تؤثر فى أى مشاهد للفيلم، ودي كانت أهم نقطة لعب عليها صناع فيلم No Good Deed اللى شاهدنا أحداثه مؤخرًا.

من تأليف إيم لاجوس وإخراج سام ميلر، بـ نشوف تارجى ب . هينسون وأدريس ألبا فى دراما مختلطة بالأكشن وبعض الرعب، عن سيدة بـ تعيش لوحدها فى منطقة منعزلة، بـ تقرر تساعد رجل عمل حادث بسيارته، ومع الوقت والأحداث بـ تكتشف أنه مجرم خطير، ومن هنا بـ يبدأ الصراع بينهم اللى بـ يحتل المساحة المتبقية من الأحداث.

من أهم عوامل النجاح الخاصة بالفيلم، الأداء التمثيلي الأكثر من رائع لتارجي هينسون وأدريس ألبا، فى الحقيقة كانت مشاهد كل واحد منهم قمة فى الروعة، أما المشاهد الأكثر من رائعة كانت المشاهد اللى بـ تجمع البطلين مع بعض، كانت فى واقع الأمر مشاهد بـ تجمع بين الإثارة والأكشن لدرجة كبيرة وممتعة.

شعرنا على مدى أحداث الفيلم أن فيه شىء غلط فى السيناريو، وتسرب لنا بعض الملل خصوصًا فى المشاهد الأولى للفيلم، لكن قدرنا “نكبر دماغنا” عن أخطاء السيناريو على حساب الأداء التمثيلى والقصة الممتعة اللى بـ نعتبرها من أفضل عوامل الفيلم.

الموسيقى التصويرية لعبت دور مهم فى دخولنا فى موود الأحداث، موسيقى محسوبة كويس جدًا ومتوظفة لخدمة سياق الأحداث بشكل كبير، وشعرنا بقوتها فى كثير من المشاهد والأحداث.

No Good Deed مش أحسن فيلم ممكن تشوفه فى حياتك، لكنه فيلم أكشن مختلط ببعض الرعب، ويستحق المشاهدة فى نهاية الأسبوع مع مشروب غازي.