The Definitive Guide to Living in the Capital , Cairo , Egypt

موسم الأعياد من أكثر المواسم اللي ممكن يتقدم فيها أفلام خفيفة وكوميدية وتقدر تحقق نجاح كبير، وتجذب شريحة كبيرة من الجمهور اللي عاوز يقضي ساعة ونصف أو ساعتين في متابعة أحداث كوميدية لطيفة.. وموسم الأعياد يخلص وكل سنة وأنتم طيبين.

فيلم Office Christmas Party من إخراج جوش جوردون، وتأليف جاستن مالين، ومن بطولة جاسون بيتمان، أوليفيا مان، تي جي ميلر، مع جينفر أنيستون وجيمي تشونغ وكيت ماكينون.

الفيلم بيحكي عن أحد فروع الشركات الكبرى العاملة في مجال الإتصالات وتكنولوجيا المعلومات. الفرع بيحقق خسائر كبيرة، علشان كده بتروح مديرة الشركة (جنيفر انيستون) علشان تدرس وضع الفرع وتقرر إغلاقه، على الرغم من العلاقة الأسرية اللي بتجمع مدير الفرع بمديرة الشركة.

علشان يمنعها من إغلاق الفرع بيحاول المدير عمل صفقة ضخمة مع أحد المديرين.. وفي سبيل إقناعه بقبول الصفقة، بينظم على شرفه حفلة ضخمة أثناء الكريسماس.. ومن هنا بتبدأ أحداث الفيلم الحقيقية واللي طبعًا مش عاوزين نحرقها عليكم علشان تقدروا تستمتعوا بالفيلم.

مشكلتنا مع سيناريو الفيلم إنه عطل الجزء الخاص بالحفلة لقرب نهاية أحداث الفيلم، على الرغم من أنها المنطقة الأساسية اللي بتنتطلق منها الأحداث الحقيقية واللي المفروض كانت تبدأ بدري عن كده، وده أجل الكوميديا الأساسية في الفيلم، كمان بنعيب على الفيلم أن جرعة الكوميديا كانت أقل بكتير مما كنا متوقعين.

الديكورات والإضاءة كانت من أهم عوامل قوة الفيلم، وقدرت الديكورات تعكس لنا حياة المكاتب في المجتمع الأمريكي بشكل حقيقي جدًا، وإزاي يقدر مجموعة من العاملين تحويل الشركة اللي بيشتغلوا فيها لملهى ليلي متكامل لما يكونوا عاوزين! أيضًا المشاهد النهائية للفيلم واللي تم تقديم مشاهد أكشن بالسيارات كانت مشاهد قوية ومؤثرة في الأحداث.

الأداء التمثيلي لأبطال الفيلم كان ضعيف، نقدر نقول بثقة أنه كان بارد ومفتقد للحيوية.. يمكن بنفس قدر برودة الطقس اللي تم تصوير الفيلم فيه، وكان واضح أن كل المشاركين في الفيلم مش بيعطوه حقه بالكامل فيما يتعلق بالمجهود التمثيلي، الإخراج المتكاسل كمان كان نقطة ضعف أساسية في الفيلم.

من الآخر فيلم Office Christmas Party فيلم مناسب للخروجات العائلية في موسم الأجازات، لكن بلاش تتوقعوا منه يكون أفضل فيلم تشوفوه في حياتكم. وننصحكم بمشاهدته فى الويك إند وأجازات أعياد الميلاد.

علشان تبقى عارف:

كلُ من (مات والاش، سام ريتشاردسون، وراندال بارك) ظهر في العرض التليفزيوني (Veep) عام 2012.

اسم الفيلم مُستوحى من إسكتش بإحدى حلقات برنامج (SNL) بنفس العنوان (Office Christmas Party).

(جايمي تشانج، وتي جيه ميلر) أدوا الأداءات الصوتية لـ(جوجو، وفريد) في فيلم (Big Hero 6).