The Definitive Guide to Living in the Capital , Cairo , Egypt

من أجمل الأمور في فيلم Ozzy أنه مش بس بيقدم حوالي ساعتين من الكوميديا، لكن كمان بيفكرنا بمجموعة من أحلى الأفلام اللي بتناقش السجون والحياة فيها، واللي شوفناها من فترات طويلة فاتت، ولم نكن نتوقع أن حد يفكرنا بيها وبشكل كوميدي كمان.

فيلم Ozzy من إخراج ألبرتو روديريجز، والأداء الصوتي لـ جيلمورو روميروف، ميشيل جينر، مع كارلوس أرسيس وداني روفيرا.

الفيلم بيحكي عن الكلب (أوزي) اللي بيعيش حياة هادئة مع أسرة جميلة بتحبه، ووسط مجموعة من الحيوانات المرفهة اللي بتعيش مع أصحابها اللي بياخدوا بالهم منهم… لكن كل شيء في حياة (أوزي) بيتحول لما بيضطر أصحابه لتركه في ملجأ للحيوانات لإضطرارهم للسفر لليابان لمدة أسبوع.

أصحاب أوزي بيتركوه في ملجأ غالي جدًا إعتقادًا منهم أن ده هيوفر له حياة كريمة خلال فترة الأسبوع، لكن أصحاب المكان بيضحكوا على البشر وبيلقوا بالكلاب في مكان أشبه بمعسكرات الأعتقال.. الأمر اللي بيحول حياة أوزي لجحيم، وبيضعه أمام تحدي صعب هو محاولة الهروب من السجن.

زي ما قولنا أفضل مافي القصة هو تشابهها مع أفلام الهروب من السجون زي The last castle أو The Shawshank Redemption، وكلها أفلام وقورة قدمت قصص إنسانية عظيمة، بالتالي تناولها في فيلم كوميدي أنيميشن موجه للأطفال والكبار بيثير عندنا موجة ضخمة من الاهتمام الناتج عن المقارنة.

الأداء الصوتي للأبطال كان متميز جدًا، لكن البطولة الأولى والأخيرة من نصيب الألوان وكادرات التصوير وتحريك الشخصيات بسلاسة على الشاشة، وكلها أمور كانت رائعة وتنتمي لفئة السهل الممتنع، وقدر الإخراج يقدمها بشكل متميز ومحبب للعين.

مستوى الموسيقى التصويرية كان أقل من توقعاتنا بالنسبة لفيلم أنيميشن، وكنا منتظرين بعض الإستعراضات على سبيل المثال، لكن من الواضح أن الموسيقى كانت من آخر الأشياء اللي تم الاهتمام بها فى الفيلم.

فيلم Ozzy بيقدم لنا أنيميشن ممتع وجميل، ويناسب الكبار والصغار على حد سواء، لكن متعتكم بالفيلم هتتضاعف لو كنتم من محبي ومتابعي أفلام الهروب من السجن والقصص الإنسانية اللي بتحصل في السجون.

علشان تبقى عارف : مخرج الفيلم ألبرتو روديريجز قدم قبل كده فيلم Marshland سنة 2014 عن قاتل متسلسل بيرتكب مجموعة من الجرائم اللي بتحير رجال الشرطة.