The Definitive Guide to Living in the Capital , Cairo , Egypt

من فترة طويلة ما شوفناش أفلام إنسانية بالقوة دى، يمكن ده كان لسان حالنا بمجرد نهاية أحداث فيلم Philomena المقتبس عن قصة حقيقية لصحفى سابق فى BBC بـ يحاول يعثر على ابن امرأه أيرلندية عجوز، أُجبرت على التخلى عنه لما كانت فى سن الشباب بعد فضيحة حملها بطريقة غير مشروعة.

الممثلة القديرة جودي دنش بـ تقوم بدور فيلومينا، الشابة الأيرلندية اللى بـ تتورط فى حمل غير مشروع نتيجة جهلها بأبسط المعلومات الجنسية الأساسية نتيجة حياتها فى أحد الأديرة فى أيرلندا، إدارة الدير بـ تقرر حرمانها من طفلها، ومن ثم بيعه لأحد الأسر الأمريكية مقابل مبلغ كبير أيامها، بعد 50 سنة من الصمت والكذب بـ تقرر فيلومينا الحديث عن الموضوع مع صحفى سابق فى الـ BBC (ستيف كوجان) واللى بـ يقرر يساعدها فى قضيتها، فى البداية كنوع من أنواع العمل ثم يتحول الأمر إلى تعاطف إنسانى.

كنا بـ نعتقد أن الفيلم هـ ينتهى بوصول الأم لابنها، لكن فى الحقيقة هو بـ يبدأ من هناك، ومش عاوزين نحرق عليكم التفاصيل أكثر من كده، لكن الفيلم يستحق التركيز فى الأحداث بشكل كبير، على الرغم من أنه فيلم مؤلم من الناحية الإنسانية، ولاحظنا دموع التعاطف من عيون السيدتين الكبيرتين فى الفيلم اللى حضروا معانا العرض (كنا ثلاثة فقط فى الصالة)، الأمر اللى يعرفنا أن المشاهدين فى مصر للأسف مش بـ يهتموا بالأفلام الإنسانية بنفس اهتمامهم بأفلام الأكشن والرعب.

الديكور لعب دور مهم فى الأحداث، سواء ديكورات بيت الراهبات أو حتى الفندق الأمريكي اللى بـ ينتقل له الصحفى والسيدة العجوز، كمان الموسيقى التصويرية كانت هادئة ومنسابة على مدار الأحداث بشكل ساعد على اندماجنا أكثر فى الأحداث.

عجبنا الخيط الكوميدي اللى حاول المخرج ستيفن فريرز تطعيم الأحداث به، ومحاولته كسر حدة ألم القصة الإنسانية، لكن كان لازم تكون الجرعة أقوى شوية لأن الأداء التمثيلى للأبطال وخصوصًا جودى دنش اللى قدرت توصل مشاعرها سواء فى لحظات الكوميديا أو التراجيديا على حد سواء، وأعطتنا انفعالات مضبوطة بالمسطرة، لا بـ توصل للهيستيريا ولا بـ تنزل لمرحلة البرود، ونقدر نقول أن الدور واحد من أفضل أدوارها على الإطلاق.

الشىء الوحيد اللى ممكن يقلل التعاطف مع القصة، النظرة اللى ممكن يبص بها بعض المتحفظين للفيلم كونه بـ يناقش قضايا زى الحمل خارج إطار الزواج، أو الإيدز أو المثلية الجنسية، وده ممكن يخلى التعاطف مع أبطال القصة أقل، وبشكل عام الفيلم بـ يحمل أفكار وبعض الجمل الحوارية اللى ممكن تكون غير مناسبة للمتحفظين دينيًا.

بـ ننصح كل الجمهور اللى بـ يحب الأدوار الإنسانية، أو القصص اللى بـ تستثير المشاعر أنهم يشوفوا Philomena لأنه يستحق المشاهدة أفضل بكثير من أفلام الأكشن والرعب الموجودة حاليًا على الساحة.