The Definitive Guide to Living in the Capital , Cairo , Egypt

مين لسة فاكر معانا منتصف التسعينيات وأواخرها؟ مع ازدهار وانتشار الجهاز السحرى (الفيديو)، أيامها كان جاكي شان متصدر قائمة أعلى مبيعات شرائط الفيديو وكان حاصد اهتمام الشباب المراهقين بسبب أسلوبه القتالى الصيني اللى بـ يتفرد به.

اليوم جاكى شان بـ يرجع من جديد للسينمات من خلال الفيلم اللى ألفه وأخرجه شينج دينج وبـ يحكى عن محقق شرطة زونج وين (جاكى شان) بـ يدور على ابنته مياو مياو (ده اسم البنت مش صوت القطة) واللى بـ يكتشف صداقتها بصاحب أحد البارات الليلية، ثم تتطور الأحداث اللى مش عاوزين نحرقها عليكم ونسيبكم تكتشفوها بنفسكم.

الأسلوب الإخراجى لشينج دينج بـ يمهد لنوعية أفلام أكشن صينية جديدة ومختلفة، أفلام قائمة على الإبهار الهوليوودي، بالإضافة للأسلوب القتالى الصينى المميز لجاكي شان، بـ نشوف كثير من مشاهد الصراع اليدوى بين الأبطال، ده غير مشاهد تبادل إطلاق النار والانفجارات وباقى الخدع السينمائية الهوليوودية المعتادة، وواضح أن حصل مزج بين الأسلوب الهوليوودي والصينى فى صناعة الأفلام.

زى ما قولنا الإبهار والخدع السينمائية لعبت دور مهم فى الأحداث، بينما الموسيقى التصويرية شعرنا أنها ما كانتش بنفس القوة اللى كنا متوقعينها، لكن بالنسبة لفيلم أكشن تركيزه الأكبر على مشاهد العنف والضرب والاشتباك نقدر نقول أن مستواها مقبول.

على الرغم من تقدمه فى السن إلا أن جاكي شان (60 سنة) لسه قادر على إقناع المشاهدين بتأدية مشاهد الأكشن وده شىء يحسب له، زيه زى بعض الفنانين فى هوليوود القادرين على الاحتفاظ بالفورمة الرياضية زى ليام نيسون أو بروس ويليس على سبيل المثال لا الحصر.

Police story من نوعية الأفلام اللى كلامنا عليها ممكن يكون قليل وما يبقاش عندنا أكثر من كده نقوله، يمكن لأن نوعية الأفلام المخلصة لفكرة الأكشن بـ يكون من الأفضل مشاهدتها عن الاكتفاء بالحديث عنها، لكن فى نفس الوقت ما نقدرش نعتبر الفيلم من أفضل أفلام الأكشن اللى شوفناها فى حياتنا، لكن ممكن يكون من أفلام الأكشن الكويسة فى الموسم الحالى، شاركونا برأيكم فى التعليقات.