The Definitive Guide to Living in the Capital , Cairo , Egypt

أفلام
Queen of the Desert

Queen Of The Desert :التاريخ مش لازم يبقى ممل!

  • جاي عبدوجاي عبدو...
  • دراما
  • فيرنر هيرزاجفيرنر هيرزاج
  • في1 Cinema
تم التقييم بواسطة
Mohamed Hamdy
قيم
قيم الآن
Queen Of The Desert :التاريخ مش لازم يبقى ممل!

يبدو أن نيكول كيدمان بطلة فيلمنا لسه ما خرجتش من تأثير عمل تاريخي تاني لها هو Grace Of Monaco واللي قدمته سنة 2014 وكان بيحكي عن الدور الكبير والهام اللي لعبته زوجة أمير موناكو، وسلطت الضوء من خلال أحداثه على خبايا كتير عن العائلة المالكة، الفرق الوحيد والأساسي بين فيلم Grace Of Monaco وبين Queen Of The Desert  كان فى الملل اللي صادفنا وإحنا بنتفرج على الفيلم الثاني.

الفيلم من تأليف وإخراج فرنر هرتزوغ وبطولة نيكول كيدمان وجيمس فرانكو وهو مقتبس عن قصة حقيقية، بنشوف قصة (جيرترود بيل) الباحثة والمستكشفة وعالمة الآثار البريطانية، واللي بتعيش حياة كئيبة ومملة فى إنجلترا قبل ما بتقرر السفر إلى طهران والعمل هناك والاقتراب من منطقة الشرق الأوسط.

بعد قصة حب فاشلة بتستهلك الربع الأول تقريبًا من زمن الأحداث، بتبدأ (جيرترود) رحلة طويلة فى الشرق الأوسط، لكن الفيلم بيستعرض الفترة اللي قضتها فى منطقة (حائل) بكثير من التركيز والاهتمام، مع استعراض بسيط للفترة اللي قضتها (جيرترود) في العراق، على الرغم من إننا بعد رجوعنا للقصة الحقيقية اكتشفنا إن (جيرترود) كانت صاحبة الفضل في تقسيم المنطقة هناك بعد نهاية الحرب العالمية الأولى وبداية الصراع على مناطق النفوذ فى المنطقة من الدول العظمى أيامها.

اختلف التاريخ حول حقيقة (جيرترود) وهل كانت مجرد امرأة بتحاول تنسى قصة حب فاشلة وللسبب ده بدأت رحلة في الصحراء اللي بتغير روحها وعقلها وطريقة تفكيرها على حد تعبيرها في الفيلم، ولا جاسوسة بريطانية ساعدت على بسط نفوذ المملكة اللي مش بتغيب عنها الشمس في المنطقة في واحدة من أشهر فترات النزاع السياسي في المنطقة؟ الفيلم بيستعرض إجابة على السؤال ده فى مشهد أو اتنين من مشاهده، لكن في الحقيقة لم يتم التركيز على النقطة دي كما يجب.

الملل اللي أصابنا نتيجة التطويل الشديد في الأحداث، واستعراض فترات متشابهة وطويلة من حياة (جيرترود) كان ممكن يتم إختصارها ودمجها في مشاهد تانية، وبشكل عام الفيلم كان عنده مشكلة حقيقية مع السيناريو والمونتاج، لكن كل عيوب الفيلم يشفع لها أسلوب التصوير المتميز، والإضاءة الرائعة اللي تعاونت مع الموسيقى التصويرية في عزف لوحات من الجمال السينمائي المتميز، والحقيقة إن التصوير في المناطق الصحراوية مش سهل، خاصًة مع أدوات التصوير الضخمة والرغبة فى الاستفادة بسطوع الشمس والإضاءة، بالتالي إحنا فاهمين المجهود المتميز اللي تم بذله في صناعة الفيلم على مستوي الصورة، ولو كان الفيلم متميز على صعيد الدراما والسيناريو بنفس قوة الصورة كان تقييمنا له هيكون أقوي بكتير.

الأداء التمثيلي لنيكول كيدمان كان قوي ومتميز، وقدرت تقدم لنا شخصية غنية وفيها انفعالات كتير، وقدرت تستوعب تطور الشخصية وتقدمها بحنكة ممثلة قديرة، على الرغم من تحول الشخصية من مراهقة حمقاء متهورة ومغامرة، إلى امرأة واقعة في الحب إلى مستكشفة وباحثة عن الآثار في منطقة الشرق الأوسط، كلها مناطق تمثيلية أبدعت فيها كيدمان وأثبتت إنها لسه قادرة على تقمص أي دور تقوم به.

طغيان الشخصية الرئيسية لكيدمان على أدوار البطولة الذكورية معاها فى الفيلم كان واضح جدًا، سواء جيمس فرانكو في دور هنري كادوجان أو روبرت باتينسون في دور (تي اي لورانس) واللي كان ضعيف وهش جدًا مقارنة بالشخصية الأصلية اللي أداها (بيتر اوتول) في فيلم (لورانس العرب) إنتاج سنة 1962 وشارك فى بطولته النجم  عمر الشريف.

 Queen of theDesert فيلم سيرة ذاتية لا يعيبه إلا الملل، مش بننصحكم تشوفوه لو كان صبركم بينفذ بسرعة وما عندكمش قدرة على مواصلة المشاهدة لوقت طويل.

عجبك ؟ جرب

Lawrence of Arabia.

نصيحة 360

 ناعومي واتس كان المفروض تقوم ببطولة الفيلم، لكنها اعتذرت علشان تحل محلها نيكول كيدمان.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح