The Definitive Guide to Living in the Capital , Cairo , Egypt

الفيلم بـ يحكى عن مجموعة من المواطنين الأمريكان غير المدربين (ماعدا واحد فقط) بـ يقرروا التصدى للقوات الغازية وتكوين فريق من الدفاع الشعبى لعمل عمليات استنزاف ضد القوات الكورية بقيادة ضابط برتبة كبيرة، وبـ تستمر الأحداث اللى مش عاوزين نحرقها عليكم أكثر من كده.
كنا ناويين نعطى الفيلم تصنيف 5 نجوم من أصل 5، لكن الاستعجال فى إخراج المشاهد وتصوير المقاومة الشعبية كلعبة فيديو جيم خلانا نتراجع عن تصنيفنا ونخليه أقل بنصف نجمة بسبب التمثيل الرائع لكل فريق العمل، بالإضافة للخدع والمؤثرات والموسيقى الحماسية اللى خلتنا مشدودين طوال أحداث الفيلم.
نتوقع قريبًا أن الفيلم يتحول لفيديو جيم شبه Call of duty أو Medal of Honor لأن فكرة تعرض الولايات المتحدة للغزو رغم أنها مش أول مرة يتم طرحها، إلا أن أسلوب تعرض الفيلم لها كان جميل رغم عدم المنطقية فى كثير من الأحداث واستعجال نهاية الغزو واستسلام الولايات المتحدة، رغم أن استسلام أقوى دولة عسكرية فى العالم –على أرض الواقع– لا يمكن يحصل بالسرعه ولا السهولة دى.
الفيلم بـ يحتوى على إسقاط سياسى مهم، بطل الفيلم اللى بـ يقوم بتدريب باقى أفراد الفيلم كان لسه راجع من خدمته فى القوات الأمريكية فى العراق، بـ نشوف مشهد مش بـ يستمر أكثر من 5 ثوانى لما واحد من الشباب بـ يسأله كنت بـ تخدم فين فبـ يرد عليه: كنت بـ أخدم فى “النجف”.. الشاب بـ يحسب أنها مدينة أمريكية قبل ما يعرف أنها مدينة عراقية، الشعب الأمريكى ما كانش عارف أى حاجة عن الحرب اللى دخلها وخرج منها وهو مش عارف إيه السبب فى الحرب دى.
المشهد الثانى فى جملة بطل الفيلم كريس هومورث لما بـ يقول لزمائله: “فرق كبير بين أنك تحارب على أرض غريبة وأنك تحارب دفاعًا عن فنائك الخلفى، اللى الأعداء بـ يعتبروه مجرد أرض أخرى، بالنسبة لنا يعنى الوطن”.
نتمنى إدارة الولايات المتحدة تدرك الفرق بين المعنيين زى ما أدركها القائمين على الفيلم.