The Definitive Guide to Living in the Capital , Cairo , Egypt

على الرغم من أن فكرة الفيديو القصير الملعون اللي لما يشاهده أحد الأشخاص بتتحول حياته لجحيم ولازم يموت خلال أسبوع من مشاهدته. على الرغم من أن الفكرة دي أصبحت قديمة وتم تقديمها من قبل، إلا أنها لازالت فكرة قابلة للتقديم وجذب الجمهور، وقدرت تصنع نجاح سلسلة Rings على الرغم من تقديمها من قبل في جزئين للسلسلة.

فيلم Rings من إخراج ف. خافيير غوتيريز، ومن تأليف جاكوب أرون إيستس، ومن بطولة ماتيلدا أنا انغريد لوتز وأليكس رو مع جوني جاليكي.

الفيلم بيحكي عن روح شيطانية بتسكن فيلم فيديو وبتقتل كل شخص يشاهد الفيديو خلال أسبوع من تاريخ مشاهدته، إلا لو قام بنسخ الفيلم واستدراج شخص تاني لمشاهدته.

في البداية بيبدأ الفيلم بمشاهد افتتاحية فى طائرة، لما بيحين موعد وفاة أحد الملعونين بمشاهدة الفيديو، ومع وفاته بتبدأ أحداث الجزء الجديد ومحاولة المعرضين للعنة بالفيديو إجبار أي شخص تاني على المشاهدة.

على الرغم من التطور التكنولوجي الكبير بين الأجزاء السابقة والجزء الحالي، لكن التطور ده لم ينعكس على المؤثرات والخدع الخاصة بالفيلم، بل على العكس أنتجت في النهاية خدع واضحة للعين أنها مصممة باستخدام الكمبيوتر والجرافيكس، وده كان شيء في غير مصلحة الفيلم.

الأداء التمثيلي للأبطال نقدر نقول أنه كان في المساحة من متوسط إلي جيد، وبشكل عام مش بننتظر كتير فيما يتعلق بالأداء التمثيلي في أفلام الرعب اللي من النوع ده، لأن كل المطلوب بيكون تأدية انفعالات الرعب والفزع، أو حتى الجنون وعدم السيطرة على النفس، وكلها انفعالات تمثيلية بسيطة ومش محتاجه مجهود تمثيلي كبير في النوعيات دي من الأفلام.

المميز في الفيلم كان الديكورات اللي شكلت خط سينمائي ممتاز، بالأضافة لزوايا التصوير وأختيار أماكن الكاميرا اللي كانت جديدة ومختلفة، وخلت الفيلم يظهر في صورة رائعة، ودي حاجة تحسب للقائمين على الفيلم.

فيلم Rings من نوعية الأفلام اللي ممكن مايكونش عندنا كلام كتير علشان نقوله عنها، لكنه في النهاية فيلم رعب يحمل فكرة قادرة على إثارة الهلع رغم تكرارها في باقي أجزاء السلسلة.

علشان تبقي عارف:

• تقييم الفيلم على موقع IMDB 5 من 10 وشارك فى التصويت حوالي 5000 مستخدم للموقع.
• تقييم الرقابة للفيلم كان PG-13 بمعني أن أي شخص أقل من 13 سنة يقدر يشاهد الفيلم بمصاحبة شخص بالغ.