The Definitive Guide to Living in the Capital , Cairo , Egypt

في 2009 حصل الفيلم الأرجنتينيEl Secreto De Sus Ojos  على جائزة أوسكار أفضل فيلم أجنبي.. هوليوود ممكن تسيب فيلم زي ده من غير ما تقدم النسخة الأمريكاني منه؟ مستحيل!

من إخراج وتأليف بيلي راي وبطولة شيوتيل إيجيوفور وجوليا روبرتس ونيكول كيدمان ومايكل كيلي بـ نشوف قصة فريق تابع للشرطة بـ يمارس عمله في أحد أيام العمل التقليدية، لكن القضية اللى بـ تيجي لهم فجأة غير تقليدية بالمرة، لأن القتيلة فيها تبقى بنت زميلتهم اللى بـ تشتغل معاهم في نفس المكتب، واللى بـ تسعى طوال أحداث الفيلم أنها تجد الجاني اللى حرمها من بنتها وتنتقم منه انتقام يتناسب مع فداحة الجريمة اللى قام بها.

الفيلم لا ينتمي لفئة أفلام الأكشن، لكن ممكن نقول أنه فيلم تشويق وإثارة، مع Twist قوي بـ يحصل في نهاية الأحداث، لكن على الرغم من قوته حسينا أنه ما أثرش فينا بالقدر الكافي، ودي كانت أسوأ حاجة حصلت لنا خلال أحداث الفيلم لأنه كان ممل في الجزء الأول منه وكان عندنا حالة عشم كبيرة في الـTwist  اللى هـ يحصل ومدى قوته.. لكنه للأسف كان ضعيف ومتوقع.

الأداء التمثيلي كان قوي ومتميز، وخصوصًا جوليا روبرتس اللى ملامحها وشخصيتها ونظرة عينها وحتى قصة شعرها أعطونا الإحساس طوال أحداث الفيلم بالعجز والضعف وانعدام الحيلة في مواجهة المجرم اللى قتل بنتها واللى بـ يفلت من العدالة بحجج ملتوية وبأساليب لا تخطر على البال.

الفيلم فيه بُعد سياسي من خلال قضية الشباب المتردد على المسجد وإزاي المخابرات بـ تراقبهم طوال الوقت وبـ تتربص بهم وبـ تلصق بهم أي تهم وبـ تحاول تزرع جواسيس وسطهم، لكن السياسة ما كانش عليها التركيز الأساسي في القصة بقدر التركيز على الإثارة والتشويق.

الحظ ما حالفناش لمشاهدة الفيلم الأصلي.. لكن بمستوى Secret in Their Eyes نعتقد أن الأصل أكيد كان أحسن من نسخة 2015 من نفس الفيلم.