The Definitive Guide to Living in the Capital , Cairo , Egypt

إحنا فى كايرو 360 من كثر الأفلام اللى بقينا نشوفها علشان نكتب لكم المقالات النقدية الخاصة بها أصبح من الصعب أن يتم خداعنا أو التلاعب بنا من قبل القائمين على الأفلام، بالتالى بـ نحترم وبـ نحب الأفلام القادرة على إيهامنا طوال الوقت بفكرة معينة، إلى أن يقرر المخرج أنه يعرفنا الحقيقة ويفاجئنا بها، ومن اللحظات الممتعة اللى بـ نقضيها فى قاعات العرض لحظات شهقات المشاهدين أثناء اكتشاف الحقيقة، وSide effects من الأفلام اللى وصلتنا لمرحلة “الشهقة” من فرط الانبهار بالخدعة الموجودة فى القصة والسيناريو.
الفيلم بـ يحكى عن إيميلى تيلور (رونى مارا) اللى بـ تتعالج من الاكتئاب على أيد طبيب نفسى محترف (جودى لو) وبمساعدة طبيبتها النفسية السابقة (كاثرين زيتا جونز) للتأقلم مع فكرة خروج زوجها من السجن، إلا أن الأعراض الجانبية للحبوب اللى بـ تأخذها بـ تخليها ترتكب جريمة قتل، ثم بـ تتوالى الأحداث اللى بـ نكتشف خلالها أن الأمور أعقد مما كنا نتصور، وأن حيلة ضخمة وراء كل اللى بـ يحصل، مش عاوزين نحرق عليكم مفاجأة المخرج ستيفن سوديربرج لكل المشاهدين.
الفيلم بـ يغوص فى العلاقة المعقدة بين شركات إنتاج الأدوية النفسية وبين الأطباء النفسيين، وبين الأعراض الجانبية اللى بـ تعلنها شركات الأدوية على استحياء على منتجاتها، ومدى عدم اهتمام المرضى بالآثار الجانبية فى مقابل أنهم يقضوا وقت لطيف بعيد عن الاكتئاب والحزن.
بـ نشوف محاولات إعلانية ذكية للغاية من شركات تكنولوجية زى منتجات “أبل” اللى تم استعمالها جميعها بداية من الـ iPhone ونهاية بالـ iMac مرورًا بالـ iPad وغيرها، وبـ نشوف تركيز فى كثير من المشاهد على المنتجات دى، وعجبنا الأسلوب الذكى فى الإعلان عنها.
رغم صغر دورها إلا أن كاثرين زيتا جونز عملت دور فى غاية الروعة والعمق، وقدرت توصل لنا كل الإيحاءات لشخصيتها كطبيبة نفسية بـ تلعب لحساب مصلحتها الشخصية أكثر ما بـ تشتغل لمصلحة مرضاها، أما جودى لو قدر يلعب دور الطبيب النفسى المحترم، وبـ نشوف محاولات أجهزة التحقيق بكافة الوسائل أنها تضغط عليه علشان يسرب البيانات الشخصية للمريضة بتاعته بلا جدوى.
إيميلى تيلور لعبت واحد من أفضل أدوارها على الإطلاق، وملامحها كانت بـ تعكس طوال الوقت الخوف والرعب، ومن ثم تغيرت ملامحها علشان تعكس باقى انفعالاتها بأداء أكثر من رائع.
ما ينفعش نختم المقال النقدي بتاعنا من غير ما نتكلم عن الموسيقى التصويرية اللى قامت بدور أكثر من رائع علشان توصل كل المطلوب منها وزيادة، ولعبت الموسيقى التصويرية سيمفونية منفردة من الروعة والجمال طوال أحداث الفيلم.
Side effects فيلم رائع يستحق أنك تشوفه بعيدًا عن الأفكار المسبقة أو مشاهدة الأفلام لمجرد الاستمتاع بأجازة نهاية الأسبوع.