The Definitive Guide to Living in the Capital , Cairo , Egypt

الحقيقة أننا نقدر نعتبر سنة 2016 واحدة من أكثر السنوات انتعاشًا في مجال انتاج أفلام الأنيميشن.. السنة دي استقبلت عدد متميز من أفلام الأنيميشن اللي نقدر نعتبرها أفلام ناجحة ومؤثرة ولها جمهور متميز وحضور رائع في قاعات العرض السينمائي.. ماينفعش نستثنى Sing من الأفلام دي… والسر في الأغاني والموسيقى اللي نقدر نقول أنها البطل الحقيقي!

فيلم Sing من تأليف وإخراج  جاريث جينجس، والأداء الصوتي لـ  ماثيو ماكونهي، ريز ويذرسبون، سيث ماكفرلين، مع سكارليت جوهانسون وجون سي رايلي وتوري كيلي.

الفيلم بيحكي عن عالم الحيوان، والمسابقة العالمية في الغناء واللي بيقيمها أحد الحيوانات في محاولة أخيرة -ويائسة- لإنقاذ المسرح اللي بيملكه ويديره من الإفلاس… القصة مش مهمة بقدر ما الأغاني والاستعراضات كانت مسيطرة على أحداث الفيلم.

الميزة في فيلم Sing أنه يصلح تمامًا للمشاهدة من الكبار والصغار على حد سواء.. الفيلم هيعجب المشاهدين مهما كان سنهم أو اهتماماتهم، عارفين ليه؟ علشان الفيلم معتمد في المقام الأول على موسيقى وأغاني مبهرة، وزي ما إحنا عارفين الموسيقى لغة قائمة بذاتها مش محتاجة أي مجهود لفهمها والتواصل معها.. وهو ده اللي حسيناه لما بدأت أجسادنا تتحرك على إيقاع الموسيقى والأغاني المختلفة والمتنوعة واللي شوفناها على مدار أحداث الفيلم.

ماينفعش بأي حال من الأحوال ننسى دور الرسومات المتقنة، والألوان المبهرة واللي نقدر نعتبرها كرنفال من الألوان اللي غزت الشاشة طوال وقت عرض الفيلم تقريبًا، والتحريك المتميز للشخصيات ورسمها بدقة جعلتنا مستمتعين بكل تفصيلة من تفصيلات الفيلم.. أما الأداء الصوتي للشخصيات فكان متميز إلى أقصى درجة، وخاصة الجميلة سكارليت جوهانسون واللي مشهور عنها الأداء الصوتي المتميز سواء في أفلام الأنيميشن أو حتى الأفلام العادية زي فيلم Her.

فيلم Sing فيلم ناجح ومتميز وهيقدر يثبت نفسه في شباك التذاكر لفترة كويسة، خاصة توقيت عرضه اللي بييجي في وقت متناسب مع موسم الأعياد، وهو موسم بيجذب المشاهدين لقاعات العرض للاستمتاع بأفلام مختلفة ومتميزة، خاصة من الفئات العمرية الأصغر سنًا، واللي هتلاقي في sing فرصة متميزة لتقضية وقت ممتع وسماع أغاني مختلفة وجديدة.

علشان تبقى عارف:

احتل الفيلم المرتبة الثانية في البوكس أوفس الأمريكي بإيرادات 56 مليون دولار.

الفيلم يعتبر ثاني فيلم رسوم متحركة للممثلة (سكارليت جوهانسون) بعد فيلم (TheSpongeBob Square Pants Movie) عام 2004.