الطفولة وذكريات الطفولة.. والبيت اللى اتربينا وعيشنا فيه أحسن سنين عمرنا.. مش بـ ينسانا ومش بـ ننساه.. لكن فى حالة الأختين مورا وكيت الوضع كان مختلف شوية.. والفيلم برضه بـ يدور عن بيت عائلة.. لكن المرة دي بشكل مختلف شوية.
من إخراج جيسون مور وتأليف بولا بيل بـ نشوف قصة أختين بـ يوصل لهم خبر نية والدهم ووالدتهم بيع البيت اللى اتربوا فيه عمرهم كله، وفى لحظة حماس وفى محاولة منهم لوقف بيع المنزل، بـ يقرروا إقامة حفلة مجنونة فى البيت.. الحفلة مش بس بـ تغير معالم البيت، لكن كمان بـ تغير معالم حياة الأختين، واللى كانت بـ تمر بفترة سلبية على الصعيد الاجتماعي والعاطفي و… مش عاوزين نحرق الأحداث أكثر من كده.
الفيلم يعتبر مباراة تمثيلية بين إيمي بولير وتينا فاي، لكن فى رأينا أن تينا كانت فى حالة تمثيلية أفضل من أختها فى الفيلم، أما إيمي فكان ظاهر عليها تأثير التقدم فى السن على الرغم من أن الفرق بينها وبين تينا سنة واحدة!
الموسيقى التصويرية للفيلم قوية ومتميزة.. بعض الاستعراضات كانت كويسة وكانت محتاجة تكون أطول زمنيًا لكن لا يزال مستواها كويس بالنسبة لفيلم كوميدي.. أما عن الكوميديا نفسها.. فكانت فى المستوى المتوسط.. مش قوية لدرجة أننا نقع من على كراسينا من فرط الضحك، ومش ضعيفة لدرجة أننا نحس بالملل مثلًا، الفيلم كان متوازن على كافة الاتجاهات ومافيش أي شىء فوق توقعاتنا على أي حال.
Sistersفيلم متوسط الجودة يصلح للمشاهدة فى ليلة من ليالي الشتاء أمام التليفزيون.. لكن فى رأينا لا يستحق الدخول فى السينما.