-
بن كرومبتونكولين فيرث...
-
غموض وتشويق
-
روان جوفيروان جوفي
-
في1 Cinema
Mohamed Hamdy
عالم تجارة المخدرات من العوالم المغرية جدًا بتناولها، سواء على الصعيد الروائي أو الفني والسينمائي، لأن العالم ده بيضمن وجود حالة من الأكشن والحركة بالإضافة للغموض، خاصة مع وجود شخص خائن في العصابة أو حتى في أوساط الشرطة، وكل ده بيخدم الهدف الدرامي النهائي للفيلم.
فيلم Sleepless من إخراج باران بو أودار ومن تأليف نيكولاس سادا وسيناريو وحوار أندريا بيرلوف وبيدور في عالم تجارة المخدرات عن ضابط الشرطة فينسنت داونز اللي بيقوم بدوره جيمي فوكس، واللي بيتورط في عملية سرقة مخدرات من عصابة مابتعرفش الرحمة.
وعلشان تستعيد العصابة حوالي 25 كيلو من الكوكايين، بيضطروا يخطفوا ابن الضابط (فينسنت)، ويساوموه على حياته مقابل المخدرات، لكن رحلة استعادة المخدرات مابتكونش سهلة بنفس قدر سرقتها في البداية، وهو ده المحور الأساسي اللي بتدور حواليه الأحداث.
الأداء التمثيلي لجيمي فوكس كان متميز جدًا، وقدر ينقل لنا مشاعر الأب اللي فقد أبنه أمام عينه، والحقيقة أن ده مش جديد على فوكس فعلى سبيل المثال إحنا مش ناسيين دوره الأكثر من رائع في فيلم Django Unchained للمخرج كوينتن ترانتينو أو دور الرئيس الأمريكي في White House Down وغيرها من الأدوار اللي كسب بسببها كتير من الجوائز العالمية زي الأوسكار والجولدن جلوب وغيرها.
لكن الحقيقة أن باقي الأدوار التمثيلية في الفيلم لم تكن بقوة دور جيمي فوكس، وخاصة البطولة النسائية واللي حسينا ان وجودها كان زي عدمه، وكان لمجرد وضع اسم في البطولة النسائية وخلاص.
الموسيقى التصويرية في الفيلم كانت متميزة، وجذبت انتباهنا من اللحظة الأولى للأحداث، بوتيرتها الغامضة وقدرتها على وضع المشاهد على أهبة الاستعداد معظم الوقت، وساعدت الموسيقى بشدة على دخولنا في المود العام للفيلم، ومشاركتنا بروحنا في أحداثه كأننا جزء منه!
الديكورات كمان لعبت دور مهم في الفيلم، خاصة ديكورات أقسام الشرطة والشوارع اللي تم تصوير المطاردات فيها، واللي وضحت لنا صورة من المجتمع الأمريكي من أسفل القاع لأعلى القمة.
حوالي 2000 مستخدم لموقع IMDB أعطوا الفيلم تقييم 5.5 من 10 وده يعتبر تقييم قليل، لكن نظرًا لقلة عدد مشاهدي الفيلم حتى الآن، بالتالي لسه التصويت لم يحسم بعد سواء لصالح الفيلم أو ضده.
فيلم Sleepless مش أفضل أفلام جيمي فوكس، ومش أفضل فيلم أكشن شوفناه مؤخرًا، لكن في نفس الوقت هو فيلم قوي ويستحق المتابعة والمشاهدة.
علشان تبقى عارف: الفيلم يعتبر أول فيلم ناطق باللغة الانجليزية للمخرج باران بو أودار.