The Definitive Guide to Living in the Capital , Cairo , Egypt

فى العلاقة المعقدة بين الأب وابنه إيه هى الحاجات اللى بـ يكون الأهل على استعداد للتضحية بها من أجل أولادهم؟ المال؟ الوقت؟ الجهد؟.. كل دى إجابات منطقية للسؤال، لكن الانخراط فى عصابة لتجارة المخدرات وتعريض حياتنا للخطر بشكل يومي كل دى أمور قرر جون (دواين جونسون) أنه يقدمها فداء لابنه، علشان يقدر يخرجه من قضية المخدرات اللى تورط فيها، وبالتعاون مع الـ F.B.I بـ يقرر يقوم بدور العميل المزدوج فى عصابة مخدرات خطرة .

الفيلم اللى أخرجه ريك رومان رو بـ يحاول من خلال الأكشن تقديم العلاقة بين الابن والأب بشكل مختلف، وكمان العلاقة بين الزوجة والزوج وصراعها فى الخوف على ابنها المهدد بالسجن مدى الحياة، وبين زوجها اللى حياته نفسها مهدده بالضياع فى صراعه مع تجار المخدرات .

الفيلم فى نصفه الثانى منحاز أكثر لاتجاه الأكشن، ويمكن مطاردات السيارات اللى كانت فى الفيلم من أكثر الحاجات اللى لفتت انتباهنا فى الأحداث، يمكن بسبب تنفيذها عالى الجودة، أو اهتمام المخرج بأدق تفاصيلها فـ خرجت للنور بتفاصيل أكسبتها واقعية ومصداقية أكثر لدى المشاهد .

الموسيقى التصويرية كمان من الأمور اللى مش عاوزين نغفلها، رغم أن كان فيها بعض أغانى الراب اللى مش بـ نفضلها، إلا أن الموسيقى فى إجمالها كانت حيوية شبابية ومتغيرة بتغير الأحداث وأعطت للمشاهد جو جديد فى المشاهدة حتى فى خضم مشاهد الأكشن كانت بـ تلعب دور فعال فى الأحداث .

فيلم Snitch رغم أنك تقدر تستنتج كثير من أحداثه إلا أنه يظل فيلم ممتع للمشاهدين وننصحك تتفرج عليه لو عاوز فيلم أكشن يحترم عقليتك ويخليك تشغل دماغك ولو لبعض الوقت.