The Definitive Guide to Living in the Capital , Cairo , Egypt

كان بقى لنا كتير ماشوفناش فيلم رعب قائم بالأساس على سبب نفسي.. وكنا تعبنا من أفلام الرعب اللي اعتمادها الأساسي على مشاهد القتل، أو حتى اللي كل قصصها عبارة عن أشباح بتستحوذ على أرواح أطفال صغيرة!

فيلم Split من إخراج نايت شايملان، ومن بطولة جيمس ماكافوي، جيسيكا سولا، براد ويليام هينك، مع نيل هوف.

الفيلم بيحكي عن (كيفين).. الشاب المصاب بمرض نفسي بيخليه يعيش أكثر من شخصية، وبيتقمص كل شخصية بشكل كامل من الألف للياء، الأمر اللي بيخليه يتحول من شخصية للثانية بسرعة مسببة للرعب والخوف في كتير من الأحيان.

نتيجة مرض كيفين بيقوم بخطف مجموعة من البنات أثناء خروجهم من المدرسة بصحبة والدهم، ومن ثم بيحتجزهم في مكان مهجور ويبدأ في ممارسة جنونه عليهم.. ومن هنا بيتولد الرعب في الفيلم، خاصة مع محاولة الطبيبة النفسية المعالجة لكيفين محاولة تحسين حالته، في نفس الوقت اللي بتبذل فيه البنات الجهد الأكبر للهرب من الكبوس اللي لقوا نفسهم فيه.

لازم نشيد بديكورات الفيلم اللي قدرت تنقلنا نفسيًا وعصبيًا للمنطقة اللي بيحكي عنها الفيلم.. الغرف الضيقة والإضاءة الخافتة اللي لعبت دور مهم علشان تنقل لنا حالة البطل العصبية والنفسية المضطربة، كمان استخدام زوايا التصوير وتصميم الكادرات اللي قدر يصور لنا حجم المعاناة النفسية للبطل، أو معاناة الضحايا في الإحتجاز، كل الأمور دي تم التعبير عنها بصريًا بشكل قوي وجذاب ومتميز.

لكن على الصعيد الأخر الموسيقى التصويرية كانت أضعف من أنها تليق بفيلم فيه القدر ده من الرعب، ولو كانت الموسيقى أكثر قوة كنا هنشوف فيلم متميز فعلًا لأن الموسيقى دايمًا بتكون من أهم عوامل تكوين أفلام الرعب. لكن للأسف في split الأمر كان مختلف وكانت الموسيقى ضعيفة.

زي ما قولنا الرعب في الفيلم كله متركز بالأساس على القصة وعلى الأداء التمثيلي، علشان كده لازم نشيد بالمجهود الممتاز في الأداء التمثيلي للبطل جيمس ماكافوي.

علشان تبقى عارف:

• الفيلم يعتبر ثاني تعاون بين (إم نايت شايملان) و(جايسون بلوم) بعد فيلم (The Visit) من إنتاج 2015.
• ذراع جيمس ماكفوي تعرض للكسر أثناء تصوير الفيلم، لكنه استمر في التصوير ليومين لحد ما اضطر يتوجه للمستشفى!
• الفيلم يعتبر الأطول زمنيًا فى مسيرة المخرج نايت شايملان.