The Definitive Guide to Living in the Capital , Cairo , Egypt

على الرغم من استمرار تقديمها بأكثر من حبكة وأسلوب درامى وتقنى وسينمائى، إلا أننا فى الحقيقة مش بـ نزهق على الإطلاق من مشاهدة قصة طرزان، يمكن لأننا بـ نحب فكرة الجمع بين ذكاء الإنسان وقوة الحيوان فى شخصية واحدة هى شخصية الطفل طرزان اللى بـ تشاء الظروف أنه ينشأ بشكل مختلف عن باقى أقرانه وسط الغابات والحيوانات اللى بـ يقدر يتعامل معاها ويفهم لغتها، بل ويستفيد بخدماتها كمان.

المرة دى بـ نشوف طرزان من خلال التقنيات الحديثة والإبهار السينمائى، ويمكن ده اللى اختلف على الحبكة السينمائية اللى سبق وشوفناها قبل كده فى قصة طرزان، وده اللى راهن عليه المخرج والمؤلف راينهارد كلوس، وزى ما قولنا قبل كده إحنا بـ نشجع فكرة المؤلف والمخرج يكونوا نفس الشخص لأن ده بـ يساعد على تقديم رؤية سينمائية إخراجية متكاملة، وعلى الرغم من إيماننا أن صناعة السينما صناعه جماعية، لكن مهما كان، فكرة أن شخص واحد يتولى التأليف والإخراج بـ تلقى عندنا قبول أكبر.

زى ما قولنا، الإبهار كان هو المسيطر على الفيلم بداية من طريقة العرض وباقى تفاصيل الفيلم، لكن لاحظنا بعض اللخبطة فى أسلوب التحريك الخاص بالفيلم لكن ده كان أمر ممكن “نفوته” أمام باقى التفاصيل المتميزة فى الفيلم.

الموسيقى التصويرية وأداء الأبطال كيلان لوثر، جيمى نيومان وغيرهم كان كويس، والموسيقى التصويرية كانت بـ تقدم مقطوعات كاملة متميزة وجميلة، وكان ممكن نعطى الفيلم تقييم أكبر لو كان بـ يتناول قصة طرزان من منظور مختلف عن المنظور اللى تعودنا عليه قبل كده.

وسط كل الشخصيات الأسطورية اللى بـ نشوفها مؤخرًا: سبايدر مان، بات مان، سوبر مان، بـ نحتاج أحيانًا عودة للطبيعة الأم، وذكريات أفلام كارتون الماضى وحكايات أهلنا عن طرزان ومغامراته فى الغابة، لو مهتم بالقصص دى نوعدك أن الفيلم هـ يكون تجربة متميزة، لكن لو بـ تفضل نوع آخر من المغامرات ننصحك تشوف فيلم ثانى.