The Definitive Guide to Living in the Capital , Cairo , Egypt

الأفلام الهوليوودية الرومانسية أصبحت قليلة جدًا فى الفترة الأخيرة… انخفاض تكلفة إنتاج أفلام الرعب والأكشن، وزيادة الطلب على أفلام الرومانسية الخاصة بالمراهقين والشباب جعلت إنتاج فيلم رومانسى حقيقي من الأمور اللى بـ نشوفها بشكل نادر إلى حد ما، وكان ممكن نعطي الفيلم تقييم 4 نجوم لو كان بس الفيلم أقل مبالغة ومافيهوش “حشو” و”مط وتطويل”.

من إخراج مايكل هوفمان بـ نشوف قصة رومانسية عن علاقة حب بـ تجمع بين شاب وفتاة (ميشيل موناجان)، على الرغم من ظروف الشاب (جيمس مارسدن) السيئة وعلاقته السيئة بوالده وأخوته إلا أنه بـ يحاول ينجح علاقة الحب بأى شكل ممكن، إلا أن الظروف بـ تجبرهم على الابتعاد عن بعضهم البعض، إلا أن القدر بـ يرجع يلعب لعبته من جديد ويجمعهم سوا بعد 21 سنة من الانفصال!

مش عاوزين نحرق عليكم الأحداث أكثر من كده، لكن كانت مشكلتنا مع الأحداث بـ تتركز بالكامل فى النصف الأخير من الفيلم، لأننا فوجئنا أن المخرج والمؤلف بـ يجبروا الأحداث على السير فى اتجاه معين عاوزين يمشوا فيه من البداية، حتى لو كان على حساب منطقية الأحداث أو طول الفيلم أو زمن الأحداث، وده اللى ضايقنا جدًا وجعلنا نهبط بمستوى الفيلم إلى نجمتين ونصف فقط.

الموسيقى التصويرية والديكور كانت متميزة جدًا، وخصوصًا الديكورات اللى قدرت تنقل لنا نمط الحياة الغربي بشكل متوازن وقوي.

على الرغم من تصنيف الفيلم فى الولايات المتحدة تحت تصنيف PG13 إلا أننا لاحظنا زيادة التدخل الرقابى فى أحداث الفيلم وقطعهم عدد كبير من المشاهد على مدار الأحداث، الأمر اللى ضايق كثير من المشاهدين وإحنا منهم وحسينا أن مقص الرقابة كان ثقيل شوية.

The Best of Me مش أفضل فيلم رومانسى هـ تشوفوه، ومش من علامات السينما المميزة، لكنه فيلم بسيط ولطيف وممكن يكسر عندكم نمط الحياة الصعبة والخانقة اللى كثير مننا بـ يعيشوها حاليًا.