الاسم.. النوع.. الجنسية.. تاريخ الميلاد.. بعض الحاجات مش بـ نقدر نختارها فى حياتنا.. لكن حاجات كثير جدًا بـ نقدر نختارها، وبـ تحددها اختياراتنا.. وبـ تتبني كثير جدًا من أمور حياتنا على الاختيارات اللى بـ ناخدها، والبدائل اللى بـ نعتمد عليها للوصول لأهدافنا فى الحياة.. عن كل ده وأكثر بـ يدور فيلم The Choice فى إطار من الكوميديا مع بعض الأكشن الخفيف والكوميديا البسيطة.
من بطولة تيريزا بالمر وتوم ويلكنسون وماجي جراس وإخراج روس كاتز بـ نشوف قصة حبيبين بـ يتقابلوا صدفة من خلال علاقة جيرة.. الرجل طبيب بيطري والبنت عندها كلبة صغيرة.. بالتالى الأمور كلها مفهومة بالنسبة لنا.. والصدف اللى بـ تجمع الحبيبين وشوية الخناقات اللى بـ تحصل فى أول العلاقة، كل الأمور دي كانت مفهومة بالنسبة لنا، ولو كان اكتفى الفيلم بالتعرض لها كان تقييمنا له هـ يكون أقل.. المفاجأة كلها فى الفيلم بـ تحصل لما بـ …. مش عاوزين نحرق عليكم الأحداث أكثر من كده.
من أجمل الحاجات اللى عجبتنا فى الفيلم.. الديكورات المتميزة واللى قدرت تنقلنا للجو العام بدون شعور بالغربة.. لكن مشكلتنا مع الفيلم كانت الشعور بالملل اللى تسرب لنا فى منتصف الأحداث تقريبًا، صحيح السيناريو عوض الملل ده بجرعة من الأحداث السريعة جدًا على الصعيد الزمني وعلى صعيد الأحداث.. إلا أننا ما نقدرش ننكر شعورنا بالملل والاستغراب من التلاحق السريع للسيناريو الزمني لأحداث الفيلم.
أماكن التصوير –وخصوصًا الجزيرة- كانت من أهم العوامل اللى جعلت تقييمنا للفيلم يرتفع، وكان واضح تمامًا الاهتمام التام بأماكن التصوير وتكنيكات الكاميرا والخدع السينمائية واللى ظهرت فى مشهد واحد تقريبًا لكنه كان يستحق الاهتمام.
The Choice من نوعية الأفلام اللى كلامنا عنها ممكن يكون قليل، لأن التجربة السينمائية نفسها تغني عن الكلام وتعوضه.. وبـ نرشح الفيلم للمشاهدة لكل محبى الأفلام الرومانسية الهادئة.
أكتب تقييم
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
