The Definitive Guide to Living in the Capital , Cairo , Egypt

أفلام
The Cobbler

The Cobbler: الحياة من خلال أحذية الآخرين!

  • آدم ساندلرداستين هوفمان...
  • فانتازياكوميدي
  • توماس مكارثيتوماس مكارثي
  • في1 Cinema
تم التقييم بواسطة
Mohamed Hamdy
قيم
قيم الآن
The Cobbler: الحياة من خلال أحذية الآخرين!

البعض بـ يشوف الحياة من منظور الآخرين من خلال عيونهم.. والبعض بـ يحس بالناس من لمسة كفهم عند السلام، لكن أن حد يشوف الحياة ويعيشها من منظور الآخرين من خلال أنه يرتدي أحذيتهم! هو ده الجديد، وهو ده اللي بـ يقدمه آدم ساندلر في فيلمه الجديد.

ساندلر من فنانين الكوميديا اللى بـ تجمع أفلامهم بين العظة والعبرة، أو الرسالة الإنسانية، وبين الكوميديا بـ يشترك فى الفكرة دي مع كوميديان عظيم آخر هو جيم كاري ومن قبلهم روبن ويليامز، ويمكن ده اللى بـ يميز الأفلام اللى بـ يقدموها وبـ يخليها تستحق المشاهدة.

الفيلم بـ يحكي عن رجل مهنته تصليح الأحذية (آدم ساندلر) عايش مكتئب وغير راضي عن حياته، مع والدته العجوزة بعد ما هجرهم والده في ظروف غامضة وتخلى عنهم، الأمور بـ تختلف تمامًا لما بـ يكتشف ساندلر أن له قدرة سحرية على أنه يتحول لأي شخص.. بشرط أنه يصلح حذاؤه بماكينة خياطة قديمة خاصة بوالده، وأنه يرتدي الحذاء ده، ساعتها بس بـ يتحول للشخص ده!

في البداية بـ يشعر بالرعب.. ثم بـ يبدأ يستكشف السلاح السري الغريب اللي وقع تحت أيده.. وبـ يبدأ في تجربة السحر الجديد في مشاهد غاية في الكوميديا، وبـ يستعمل الموضوع ده علشان يخلي حياته أفضل، وحياة اللي حوله، وينشر السلام والخير بقدر ما يقدر.

البطولة توزعت بين ألين باركين، ميثودمان، داسكا بولانكو وأخيرًا داستن هوفمان كضيف شرف مع مشاركة متميزة من ستيف بوشيمي بأداء متميز، وإن كان مساحة ساندلر ودوره ما كانوش بالقوة أو الكثرة اللي كنا نتوقعها بالنسبة لبطل الفيلم.

الموسيقى التصويرية ما كانتش بالقوة اللي نتوقعها لكن المؤثرات الخاصة كانت متميزة وخصوصًا الخدع اللي لها علاقة بـ تغيير الشخصيات بعد ارتداء الأحذية، تم تنفيذ المشاهد دي بذكاء وسهولة في نفس الوقت.

الفيلم بـ ينتمي لفئة الكوميديا المختلطة بالرسالة الإنسانية، لكن الملل أصابنا في منتصف الفيلم قليلًا، على الرغم من قوة القصة وتماسك السيناريو، لكن السيناريو وتدفق الأحداث ما كانش بالقوة اللي كنا نتوقعها.

بين الكوميديا والرسالة الإنسانية بـ يتأرجح فيلم آدم ساندلر الجديد، تقييمنا له هـ يكون من متوسط إلى جيد، ونرشحه للمشاهدة لطويلي البال ومن محبى ساندلر بشكل عام.

عجبك ؟ جرب

فيلم Click.

نصيحة 360

ده الفيلم العاشر اللي بـ يجمع بين آدم ساندلر وستيف بوشيمي، والأول اللى بـ يجمع آدم ساندلر مع ميثود مان.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح