The Definitive Guide to Living in the Capital , Cairo , Egypt

فيلم The Great Wall بيحكي عن سور الصين العظيم والأسرار اللي بتحيط بناؤه، ومحاولة مجموعة من العسكريين الصينيين التصدي لمحاولة ضخمة لغزوه. لكن هل فريق الفيلم استغل الفكرة الجميلة دي في تقديم فيلم مستواه قوي من حيث كل العناصر؟ خلونا نشوف.

فيلم The Great Wall اللي أخرجه يمو زانج وقام ببطولته مات ديمون وبيدرو باسكال و وليام دافو وتيان جينج مع أندي لاو ونعمان آكار، بيعتمد في المقام الأول على الإبهار البصري ومشاهد القتال الصيني المختلفة والمتميزة، لكن هل ده كافي لإنجاح فيلم؟ أكيد لأ.

زي ما قولنا الفيلم بيعتمد في درجة كبيرة من أحداثه على الإبهار البصري، والقائم على مشاهد الصراع والضرب بالمنجنيق وغيرها من المشاهد اللي بتخلي عين المشاهد مشدودة تمامًا للتفاصيل المختلفة. لكن في المقابل الأداء التمثيلي كان أضعف من المؤثرات والخدع البصرية، وحسينا إن الإخراج اهتم بإظهار صورة جيدة على الشاشة على حساب توجيه أبطال الفيلم لتقديم أداء تمثيلي قوي، والحقيقة دي غلطة أصبحت متكررة في عالم صناعة الأفلام المعتمدة على الخدع السينمائية والجرافيكس وخلافه.

حسينا أن الموسيقى التصويرية لم يتم الإهتمام بها كفاية، لكن ده لا ينفي أن بعض المشاهد كانت مميزة على مستوي الموسيقى، لكن كنا متوقعين نسمع مقطوعات موسيقية صينية جميلة تثير المشاعر وتحرك الشجن بداخلنا. لكن للأسف الفيلم فشل في استغلال أن الصين هي المكان اللي بتدور فيه الأحداث، وكان ممكن النقدة دي تخلي الموسيقى مبهرة أكثر.

لكن على الرغم من ضعف الموسيقى النسبي، الديكورات كانت قوية ومتميزة، ونقلتنا بصريًا لعالم الصين في العصور القديمة، وبسبب الغموض اللي بيحيط الفترة الزمنية دي فده أعطي للقائمين على ديكورات الفيلم مساحة واسعة للإبداع وتقديم أفضل ما عندهم.

ميزانية الفيلم كانت كبيرة وتم تخصيصها بالمقام الأول لصالح إنتاج صورة مبهرة، ومؤثرات خاصة قوية، لكن زي ما قولنا الأداء التمثيلي والموسيقي كانت محتاجة تكون أقوي وأكثر إبهارًا وتميزًا. وعدم حدوث ده خلانا نحس بخيبة أمل حقيقية.

فيلم The Great Wall ننصح بمشاهدته بدون توقعات عالية مسبقة، لو شوفتوه بغرض المتعة والمتعة فقط، ممكن يكون فيلم ممتاز في الحالة دي.

علشان تبقى عارف:

• كان النجم (ألكساندر سكارسجارد) مُرشحًا للدور قبل (بينجامين والكر)، ولكنه انسحب منه.
• الفيلم يعتبر الفيلم الهوليودي الأول للممثل (آندي لو).
• الفيلم هو الفيلم الصيني الأعلى تكلفة على الإطلاق حتى الآن.