The Definitive Guide to Living in the Capital , Cairo , Egypt

الحقيقة أننا فى كايرو 360 بقى لنا كثير ما شوفناش أفلام خيال علمى.. عارفين أن فى قاعات العرض عدد من الأسماء لأعمال متشوقين أننا نشوفها لكن كان واحشنا بعض أفلام الخيال العلمى بعد موجة من أفلام الأكشن والرعب أو حتى الأفلام الكوميدية.

الفيلم بـ يطرح فكرة فلسفية فى غاية الأهمية.. إيه الأهم فى الإنسان؟ عقله أم جسده؟ قدرته العضلية أم قدرته الذهنية؟ أم أن الحقيقة أن قدرات الإنسان الأصلية بـ تكمن فى التكامل والتواصل بين عقله وجسده؟

مش حابين نجاوب بنفسنا على الأسئلة دى علشان ما نتدخلش فى رؤيتكم للفيلم وتفاعلكم معاه، وده كان الهدف الرئيسى من إخراج وتأليف أندرو نيكول وبطولة ديان كروجر وسواريز رونان وغيرهم.

الإبهار فى الفيلم كان على مستوى مقبول، ممكن نقول أنه كان أعلى من المتوسط بدرجة أو اثنين على الأقل، لكن أكثر حاجة عجبتنا أن القائمين على الفيلم ما كانوش معتمدين على الإبهار فقط كحل وحيد لتحقيق الإيرادات، دى الموضة اللى أصبحت منتشرة اليومين دول فى الأفلام واقتصارها على الإبهار فقط كعامل لجذب المشاهدين.

الحيلة دى ممكن تنفع فقط مع المشاهدين الموسميين للسينما، أما لو مشاهد مهتم بمتابعة الأفلام مش هـ يحس بالإبهار المطلوب وهـ تبقى الطبخة السينمائية كلها فاسدة بالنسبة له.

الديكورات والموسيقى التصويرية لعبوا دورهم المطلوب منهم بالضبط وقدموا للمشاهد الجو اللى المفروض يعيشه قياسًا على فيلم للخيال العلمى.

باختصار: The Host فيلم خيال علمى متوسط الجودة يصلح للمشاهدة فى الويك إند، أما لو كنت من المشاهدين المتخصصين أو المحبين لنوعية الخيال العلمى ننصحك تنتظر عمل أفضل من كده.